NASHONNAN UNI, USA (AFP).- Famianan di víktimanan dje atake di Hamas den Israel ta reklamá ku e agensia di Nashonnan Uní pa refugiadonan palestino a fasilitá un matansa sin presedente, segun dokumentonan hudisial.

UNRWA (Agensia di Nashonnan Uní pa Refugiadonan Palestino), ku ta kordiná di forma pasífiko e yudansa den Gaza, for di den luna di yanüari a keda akusá di parti di Israel  ku un dozein di su 13.000 empleadonan a tuma  parti den e atakenan den kua 1.195 hende a muri, e mayoria sivilnan.

E akusashonnan a trese kuné ku vários gobièrnu, inkluso esun di Merka a suspendé yudansa na e agensia, menasando su esfuersonan pa entregá yudansa na Gaza, ounke ku vários a reanudá nan finansiamentu.

E demandantenan ta bisa ku UNRWA, komo tambe vários dirigente dje organisashon, “a pasa mas di un dékada promé ku e atentado di 7 di òktober yudando Hamas pa konstruí e infrastruktura terorista i e personal nesesario pa por a realisá e atentado”.

Nan ta akusá Nashonnan Uní ku “sabiendo kiko por pasa a sòru pa dollar norteamerikano a yega serka Hamas pa por a paga kontrabandistanan di arma, eksplosivo i otro material  terorista”.

Un investigashon independiente, ku na kabes e eks minister franses Catherine Colonna, a rekonosé ku tabatin problema di “neutralidat” entre algun funshonario dje organisashon, pero a konkluí ku Israel no a presentá prueba di su akusashonnan.

E hefe di UNRWA, Philippe Lazzarini, un di esnan ku a demandá, a ripití ku Israel “mester para su kampaña kontra di UNRWA”.

“E guera den Gaza a produsí un despresio flagrante pa e mishon di Nashonnan Uní, inkluso atakenan no digno kontra di empleadonan, instalashonnan di operashon (di UNRWA)”, segun Lazzarini a skibi den un artíkulo di opinion públiko den New York Times luna pasá.

E keho a keda presentá na New York pa motibu ku UNRWA ta usa servisionan bankario dje siudat, segun abogadonan dje demandantenan, representá pa dos ofisina di abogado, un di New York i otro di Chicago.

“Praktikamente tur e sèn ku UNRWA a gasta pa yuda Hamas pa konstruí su infrastruktura terorista den Gaza a bini di un kuenta na New York dje banko JP Morgan Chase”, segun nan ta agregá.

UNRWA no a reakshoná riba e solisitut di informashon di parti di AFP.

 

LAGA UN KOMENTARIO

Please enter your comment!
Please enter your name here