TEL AVIV, ISRAEL (AFP).- Famianan i hendenan yegá na personanan asesiná òf sekuestrá den e atake di Hamás di 7 di òktober 2023 a reuní djaluna anochi na Tel Aviv, kaminda huntu a kompartí rekuerdonan di nan sernan kerí i a pidi pa regreso di e rehennan.
Algun dje músikonan mas konosí dje pais a toka miéntras imágennan dje víktimanan tabata aparesé riba pantayanan grandi.
“Hinter e pais ta warda e siguiente etapa, esun di nos rehabilitashon”, segun Nitza Corngold, kende su yu Tal Shoham a keda sekuestrá den e atake.
“Nos sa den nos mentenan, den nos kurasonnan, den kada sèl di nos kurpanan: lo no tin rehabilitashon sin e regreso di e rehennan…tur!”
E enkuentro den e parke Hayarkon di Tel Aviv tabata un alternativa pa e seremonia ofisial di gobièrnu. Famianan a opta pa evitá e polítika polarisante israelí na okashon dje aniversario.
E tema dje evento tabata unidat, ku famianan di e komunidatnan hudiu, árabe i otronan ku a papia huntu ku sivilnan i sòldánan riba e víktimanan.
Entre e personanan rekordá a figurá e famia Kapshetar, formá pa e mayornan Dina i Evgeny i nan yunan Ethani Aline. E famia a bai un ’camping’ den zùit di Israel i dia 7 di òktober nan tabata regresando ora ora ku kombatientenan di Hamás a mata nan.
E seremonia di Tel Aviv a tuma lugá den e lokal mas grandi di konsiertonan di Israel, kaminda e organisadónan a repartí 40.000 entrada.
Pero e seremonia a keda limitá na famianan i prensa debí na e restrikshonnan militar pa e atakenan di gruponan pro-iraní kontra di Israel.
E evento ofisial di gobièrnu a keda transmití poko despues dje seremonia di Tel Aviv, i e promé minister, Benjamin Netanyahu, a primintí pa sigui bringa te ora kompletá e “mishon sagrado” di e guera kontra di Hamás.
