WILLEMSTAD.- Algun famia ta preokupá despues ku nan a tuma nota ku a vandalisá un kèlder den Santana Protestant den Roodeweg.  Billy Jonckheer i su famia a bishitá e santana djadumingu último relashoná ku Dia di Mama. Nan a bai rindi tributo na nan mama i nan wela relashoná ku e dia aki. Jonckheer a splika ayera ku el a tuma nota ku tabatin un di e kèldernan habrí. E kaha di morto tabata tirá dilanti di e kèlder i no por a mira niun kaminda sobránan di e restunan mortal. Esaki ta un asuntu di preokupashon ku nos lo bai atendé, asina Jonckheer a bisa ayera. El a pone un portrèt tambe di e kèlder vandalisá riba retnan sosial.

Aktonan di vandalismo kontra kèldernan no ta algu nobo. Tin dos motibu básiko ku esei ta tuma lugá. Na promé lugá tin hende ta kere ku nan por haña atributonan balioso ku a dera un defuntu ku ne, manera renchi, kadena i otro prendanan. Tin sinembargo un desaroyo mas preokupante ku ta e kreensia den partinan di defuntu pa hasi brua kuné, konosí komo “magia negra”. Den e kuadro aki tabatin denunsia di diferente santana katóliko ku a vandalisá den último añanan kaminda a bai prinsipalmente ku e kabesnan di defuntu. Opviamente ku pa e famianan  ta algu masha penoso pa tuma nota di loke a bin ta tuma lugá ku nan serinan kerí.

Parokianan tambe ta man na kabes pasobra nan no por hasi masha. Hopi biaha e santana ta keda serka di un misa pero sin vigilansia parti anochi. Den dia algun santana tin hende ta traha fiho na e sitio loke ta stroba “elementonan” ku mal intenshon pa yega na e santananan. Te asina leu ku ta konosí ta promé biaha ku a vandalisá un kèlder den santana protestant, aloménos asina ta parse segun e promé indikashonnan.

LAGA UN KOMENTARIO

Please enter your comment!
Please enter your name here