Ya tin 2 morto i tin mas hopi malu

WILLEMSTAD.- Famianan a reuní i nan ke sa ta ken di nan a hiba e vírùs di COVID den Nos Lantèrna. Siman pasa EXTRA a papia ku direktora di e instituto i el a bisa di ta sospecha ku ta bishitante a trese e vírùs den e instituto. E famianan ta basta indigná ku e deklarashon aki i nan ke klaridat di e kas di kuido. Nan a bisa den e reunion ku nan a tende di otro ku ta nan ta e úniko bishitantenan di e sentro aki i p’esei nan ke sa ta kua di nan a hiba e vírùs den e instituto.

E situashon den Nos Lantèrno ta basta di lamentá ya ku di e 6 klientenan ku COVID tin 2 a fayesé i tin 2 otro basta grave. Nan a komprondé ku e situashon ta bou di kòntròl, pero nan ke sa kon bou di kòntròl asina e situashon ta ku asta morto a kai.

E famianan a bisa ku den e ola anterior kaminda tin basta hende ku a fayesé, tabatin kliente den e instituto aki tambe ku a keda kontagiá ku e vírùs. Nan ta kòrda ku na e okashon ei e dòkter di Kòrsou ku tabata na e instituto a sera e sentro hermétikamente pa asina por a tene e kontagionan na un mínimo. I segun e famianan den e kontagio serka nan grandinan den e ola anterior ta trahadó di e instituto a hiba e vírùs ei den. I p’esei nan ke sa ki garantia tin i ki prueba tin awor ku ta bishitante a hiba e vírùs den e instituto.

E famianan a bisa EXTRA ku nan a reuní i lo bai aserka e direktora di e instituto pa nan haña klaridat ta kiko ta pasando.

 

 

LAGA UN KOMENTARIO

Please enter your comment!
Please enter your name here