WILLEMSTAD– Miembro di direktiva di partido PAR, Luigi Faneyte a entregá un di dos keho na Prokurador General di Kòrsou den kuadro di pèrmitnan pa e sektor di “online gaming”. E keho ku ta den forma di un rapòrt komplementario riba e promé rapòrt/keho, Faneyte ta bisa ku tin prueba konkreto di patronchinan sistemátiko di froude, mal maneho i labamentu di plaka na Gaming Control Board (GCB) ku ta e supervisor di e sektor di wega di plaka kaminda partidonan lokal i internashonal ta hunga un ròl importante.
E di dos keho aki ta un kontinuashon riba e promé keho Faneyte a entregá dia 24 di novèmber último i na su opinion ta kontené prueba adishonal ku ta partidonan envolví manera minister di Finansa, Javier Silvania, e invershonista di Malta Mario Galea, Aideen Shortt, Mario Fiorini i awor tambe Random Consulting Ltd., Jeannitza Felix, Phaedra Hanst, IGA Trust B.V., Cedric Pietersz, i GCB ku lo a hasi nan kulpabel na violashonnan serio.
Segun ta bin dilanti den e keho prinsipalmente e mal maneho na GCB bou di maneho di Pietersz ta notabel. Asina lo a move operadónan di lisensia pa nan hasi pago ku moneda digital (“crypto”) pa medio di lenknan ku tabata manda separadamente for di e fakturanan. E manera di amatùr ku tabata hasi esaki tabatin komo konsekuensia ku tabata falta informashonnan importante manera e ret òf adrès korekto pa e transakshonnan.
Esaki probablemente a lidia na transakshonnan di “crypto” ku a bai pèrdí ku e konsekuensia ku diferente keho di parti di operadónan. Turesten Galea i GCB ta tira falta riba otro miéntras ku minister Silvania ta keda ketu. Niun hende sa ken ta responsabel pa e daño, Faneyte ta sigui trese dilanti den su keho.
E kalkulashonnan ofisial ku GCB ta referí na dje ta resultá di ta un kuenta na Electronic Money Institute na Repúblika Cheko ku segun Faneyte ta mina e legitimidat di e e transakshonnan. “Riba fakturanan falta informashon esensial manera nòmber di esun ku a hasi e transferensia, loke ta lanta pregunta riba envolvimentu di GCB. No ta kla ta kuantu transakshon eksitoso di ‘crypto’ a logra prosesá.”
Pa Faneyte esaki ta prueba ku a faya den supervishon i maneho. “E prueba den e rapòrt komplementario aki ta mustra kon un grupo selektá di individuo i entidat aktivamente a kontribuí na mina e regulashon di wega di plaka di Kòrsou. E individuonan aki a lanta GCB no komo un instansia di kontròl, pero komo un fachada ku ta fasilitá transakshonnan no regulá i konfliktonan di interes.”
Finalmente Faneyte ta bisa ku e rapòrt ta enfatisá ku ta trata di abusunan ku ta krusa frontera i ku implikashon di kompanianan di Merka, Malta i Repúblika Cheko. E aktonan konstatá aki segun e miembro di direktiva di PAR ta un peliger pa Kòrsou su reputashon i pa sanshonnan internashonal i ta motibu pa outoridatnan tantu na Kòrsou komo den eksterior pa inisiá ku un investigashon penal profundo. Pe e motibu aki Faneyte ta bisa di a hasi keho na New Jersey, Merka, Malta i Repúblika Cheko.
E ta pidi transparensia i persekushon hurídiko di tur partido envolví: Ta esensial pa restourá e konfiansa den nos institutonan i sòru ku Kòrsou ta kumpli ku normanan internashonal. Solamente pa medio di un investigashon profundo i independiente por evitá ku tipo di abusunan aki ta kontinuá. Pietersz tambe mester tuma su retiro inmediatamente.”
Foto:
…Luigi Faneyte…
