‘Riesgo pa pais ta grandi’
WILLEMSTAD.- Parlamento di Kòrsou ta ta trata awe e lei di LOK (“Landsverordening Online Kansspelen”) i miembro di direktiva di PAR, Luigi Faneyte ta pidi presidente di parlamento, Charetti America-Francisca pa e asumí su responsabilidat i posponé e votashon riba e lei. Den un karta dirigí pa America-Francisca Faneyte ta pone miembronan di Parlamento na altura di un asuntu ku e ta konsiderá serio i na su opinion ta pone supervishon finansiero i reputashon di pais na riesgo. Tambe Faneyte ta bisa ku el a manda un karta pa Banko Sentral di Kòrsou i Sint Maarten (CBCS), kaminda e ta splika e problema aki.
“For di dokumentunan a komprobá ku Gaming Control Board (GCB), bou di liderato di minister Javier Silvania, a akseptá pago den moneda digital (“cryptocurrency”). Esei ta prohibí, ta un delitu i peligroso pa e reputashon di Kòrsou i di Reino”, Luigi ta bisa. Na su opinion minister Silvania ke pasa e LOK pa legitimá e práktika akí.
“Mi ta atvertí ku esaki por tin konsekuensia grave.” E miembro di direktiva di PAR ta splika ku supuestamente ta bende e lisensianan pa “stablecoins” ku ta un tipo di moneda digital. “Algun persona ta konsiderá esaki komo un moneda digital sigur, pero CBCS i tambe Banko Sentral di Hulanda ta diferensiá di opinion tokante ‘stablecoins’. Aktualmente ‘stablecoins’ ta un ‘wild west”, manera konsehero di minister, Mario Galea mes a menshoná.”
Faneyte ta sigui bisa ku tin poko kontròl riba transakshonnan den e moneda aki i kriminalnan por abusá di esaki. “Sinembargo, minister a skohe pa akseptá e pago akí na nòmber di gobièrnu.” E fakturanan di GCB, segun e splika, no ta menshoná nada di “crypto”, pero ta manda e-mailnan apart ku lenk pa e pagonan.
“Den su splikashon di e LOK, minister a deklará ku ta aseptá solamente pago ‘normal’, pero tin prueba ku den práktika ta risibí pago den forma di moneda digital.” Esaki, Faneyte ta duna di konosé, ta hasi ku ta difísil pa sigui e pagonan. “Ningun hende ta sigur ken ta paga òf ken ta risibí.”
Segun e miembro di direktiva di PAR den ningun otro parti di Reino algu similar ta tuma lugá. “CBCS i Banko Sentral di Hulanda ta kla den esaki: e ta iresponsabel.” E desishon di minister Silvania, segun Faneyte ta konkluí, ta afektá Hulanda i Sint Maarten tambe.
Aparte di esaki, Faneyte ta sigui splika ta prosesá e pagonan supuestamente via un “Electronic Money Institute” instituto di plaka elektróniko na Repúblika Cheko, ku no ta un banko normal manera bankonan komersial ku konosé na Kòrsou. “Esaki ta oumentá e chèns di abuso i froude. Mester investigá kiko realmente ta tumando lugá pasobra empresanan ta keha ku nan no a risibí nan pago den ‘crypto’.
Segun Faneyte instrukshon pa e pagonan no ta kla i esaki por resultá ku un hende ta pèrdè su pago den “crypto”. “Gobièrnu ta esun ku ta paga pa e dañonan aki i a skonde e echo aki pa Parlamento.” Faneyte ta rekomendá parlamento di Kòrsou pa diskutí e punto aki CBCS, Banko Sentral di Hulanda i parlamentonan di Hulanda i St. Maarten. “Esaki ta un kuestion di Reino. Aseptá pago den ‘cryptocurrency’ manera esaki ta un delitu i si aprobá e LOK no por koregí e erornan mas. E riesgo ta grandi ku ta daña e relashon di Reino i reputashon di Kòrsou.
Foto:
…Petishon pa presidente di parlamento, Charetti America-Francisca no pone lei di LOK na votashon awe…
