BOGOTA, AP.- E hefe máksimo di FARC a bisa ku el a ordená su guerieronan pa pone fin na ekstorshonnan i suspendé reklutamentu di kombatientenan.
‘Mi a keda di duna òrdu na tur struktura di FARC pa suspendé impuesto di tur aktividat ekonómiko legal ku tin den e regionnan” di e pais. asina Rodrigo Londono alias Timochenko a indiká den un entrevista publiká djamars riba e portal Agensia Prensa Rural. E lider gueriero ku a asumí e puesto komo komandante di FARC na final di 2011, a sigurá ku “nos ta hasiendo kosnan ku nos no a anunsiá na nos pais, ku nos no a komuniká pa diferente motibu. Tres luna pasá nos a suspendé reklutamentu di hòmber i muhénan pa filanan di FARC”.
Den e mesun entrevista “Timochenko” a reiterá ku FARC ta aseptá e desishon di korte Konstitushonal riba e akuerdonan di gobièrnu den negosiashon na Cuba.
Desde ku e proseso di negosiashon a kuminsá na final di 2012 na La Habana, e presidente Juan Manuel Santos a bisa ku pueblo mester disidí riba e puntonan riba mesa di negosiashon den un referèndem.
Aktualmente, Korte Konstitushonal, tribunal máksimo di e pais den asuntunan di e karta magna ta revisá si Kongreso a ahustá un lei di konstitushon pa firma un akuerdo atraves di un votashon. Dia 23 di yüni, FARC i atministrashon di presidente Santos a bai di akuerdo pa un tregua definitivo i a retirá armanan di un parti di e rebeldenan.