WILLEMSTAD.- E desaroyo di Waterfort Plaza den Punda ta drenta un fase nobo. Studio Akkerhuis i Lyongo architecture ta trahando na enkargo di Algemeen Pensioenfonds Curaçao (APC) riba e diseño pa e redesaroyo di e área di Plaza den Punda.
Un gran parti di e área históriko di e fòrti alrededor di e anterior Plaza Hotel a keda pa hopi tempu no aksesibel pa públiko. Ku e inisio di e fase di diseño pa e re-desaroyo di Waterfort Plaza, esaki ta bai kambia. Pa promé biaha lo ta posibel pa kana riba e Waterfort i banda di e arkonan históriko den e área. Sentral den e diseño ta un plasa públiko nobo, konstruí riba un nivel elevá ku ta subi te na e nivel di e Waterfort. For di aki, residente i bishitante lo por kana libremente den e área i disfrutá di e bista riba bahia di Santa Ana i laman Karibe.
E toren bieu, ku anteriormente a keda kompletamente desmantelá, ta duna lugá na un programa di konstrukshon nobo multifunshonal ku espasio pa biba, un ‘hotèl butik’ i fasilidatnan manera bibienda i ofisinanan. Asina ta krea espasio pa reorganisá e área, oumentá e bida den sentro di siudat i hasi esaki mas atraktivo pa futuro residente i bishitante.
Patrimonio komo parti integral di e desaroyo
E re-desaroyo di e área ta enfoká riba preservashon i restourashon di elementonan históriko balioso. Patrimonio ta forma un parti importante di e plan, entre otro, pa motibu di su status komo sitio di Patrimonio Mundial di UNESCO. A realisá ku tin pregunta i preokupashon den komunidat tokante e desaroyo di e área spesial akí. P’esei a kondusí vários estudio i análisis den añanan pasá pa manehá e patrimonio ku kuidou, i e resultadonan a sirbi komo guia pa e diseño.
Ademas, a realisá un ‘Heritage Impact Assessment’ pa evaluá e desaroyo den e ambiente riku di patrimonio. Entre otro, e fòrti históriko i e liñanan di bista importante di e siudat i laman lo keda mantené i fortifiká. Miéntras e área ta aktualmente pa será gran parti , ta trahando ariba pa abri e patrimonio atrobe pa públiko, meskos ku e dak di e fòrti tabata aksesibel den dékadanan anterior.
Arkitekto Lyongo Juliana ta papia tokante e proyekto:“E área akí ta konta un parti importante di historia di Kòrsou, un pida di historia ku meresé pa hasié visibel. Pa promé biaha e Waterfort ku su strukturanan di arko lo ta kompletamente aksesibel pa públiko. Pronto hende lo kana riba i den e área, krusando e área for di entrada di haf (Plaza Piar) te na playa di Marichi. E diseño nobo ta introdusí tres diferente ruta pa eksperensiá e herensia di aserka: banda di e arkonan históriko, komo riba e fòrti i via e nivel di kaya aktual.”
Un área habrí pa tur hende
Ta desaroyá Waterfort Plaza komo un área urbano habrí ku un plasa nobo, ruta di kana i konekshonnan públiko. Durante e elaborashon di e plan maestro, tin koordinashon ku e Ministerio di Tráfiko, Transporte en Planifikashon Urbano (VVRP). Na yanüari 2025, e ministerio a emití enprinsipio un evaluashon positivo pa esaki. E plan ta enfoká riba restourashon di strukturanan históriko, liña di bista i ruta públiko i analisá kon e desaroyonan nobo por konektá mihó ku esaki i ku e otro partinan di Punda.
Bart Akkerhuis (Studio Akkerhuis) ta kompartí su vishon tras di e plan:
“Awe, un di e lugánan mas bunita di Willemstad ainda ta sinti manera un área lubidá di e siudat. Ku un piazza públiko nobo (plasa abou), kayanan yen di bida, mas bèrdè i sombra, ta krea un plasa pa Kòrsou. Aki nos ta krea un lugá pa hende: pa topa otro, pa keda i pa eksperensiá e siudat di nobo. Un plasa ku ta trese energia bèk na Punda i ku lo krese bira un lugá yen di historia i rekuerdo, manera Plaza tabata un tempu”.
Invertí den futuro di Willemstad
E desaroyo ta posibel, entre otro, danki na invershon di APC. Maneho di APC: “Komo invershonista di término largu, nos ta mira desaroyonan ku ta kontribuí na un ekonomia fuerte i un siudat pa biba. Ku Waterfort Plaza, nos ta invertí den revitalisashon di Willemstad. Ta desaroyá e proyekto ku bista riba balor duradero pa futuro. Paso pa paso nos ta yuda traha un siudat kla pa awe i pa e siguiente generashonnan.”
Den e último sinku añanan, APC a tene kontakto aktivo ku diferente partidonan enbolbí, manera empresarionan, ekspertonan di patrimonio, studiantenan i otro partidonan enbolbí. E kombersashonnan, estudionan i seshonnan públiko a kontribuí na e plan maestro (yüli 2024) di Studio Akkerhuis. E trayekto di partisipashon i ‘placemaking Road2Plaza’ a lansa pa involukrá hende ku e área i oumentá vibrashon, komo preparashon pa e desaroyo final. Esaki a inkluí aktividatnan “pop-up i un ofisina di proyekto na Gomezplein 5 komo punto di informashon. Komo parti di e trayektoria akí, Road2Plaza a organisá i a partisipá na vários aktividat den pasado, manera e Festival di Waterfort na 2022, aktividatnan “pop-up” durante e Festival Kaya Kaya, aktividatnan durante Dia di Rei i Dia di Bandera, charlanan invitá, i partisipashon na e programa SustainaBUL di Universidat di Kòrsou (UoC)
Den diálogo ku komunidat
Durante e próksimo lunanan lo traha riba un diseño di Studio Akkerhuis i Lyongo Architecture pa e desaroyo nobo den e área. Lo publiká aktualisashon riba wèpsait di Road2Plaza.
Tin hopi pregunta rondó di e desaroyo di e área. Si mientras tantu bo tin pregunta kaba tokante e proyekto, bo por hasi nan via di e wèpsait di Road2Plaza. Den futuro lo organisá reunionnan di informashon tambe pa papia ku e diseñadónan i esnan enbolbí den e proyekto.
Waterfort Plaza ta forma un punto importante den e desaroyo mas amplio di Punda, den konekshon ku e re-desaroyo resiente di Korte di Hustisia. Mientras ku e área akí tabata fragmentá i pa gran parti será pa añanan, trabounan ta andando awor riba un solo área urbano kohesivo den kua espasio públiko, historia i bida urbano ta bini huntu pa promé biaha.
