Favela Street a klousura otro aña eksitoso, ku un grupo di hóbennan bon entrená pa sigui ku e proyekto. Aña pasa Djasabra a papia ku tres di e hóbennan modelo di Favela Street; Quincin Dorothea konosí komo Rogier, Stephany Passial i tambe Shurylianne Leito konosí komo Shuku. E tres hóbennan aki komo ehèmpelnan di nos sosiedat ta guiando esnan mas chikí. Den luna di yüli Rocky tabata na Kòrsou i huntu nan a klousura e proyekto, ku presentashonnan entre otro di loke nan a siña i nan eksperensianan, esaki den presensia di famia.

E nòmber Favela ta portugues di Brasil. Ta trata di terenonan ku hendenan ku poko entrada ta poderá di dje i hasi nan bibá. Barionan grandi ku bo por haña na kosta pero tambe mei mei di Brasil. E barionan aki ta basta atraktivo pa nan kultura i nan kreatividat. Aki na Kòrsou nos tin un proyekto Favela Street Kòrsou.

Ta trata di un proyekto di un organisashon di futbòl di kaya. Favela Street ta krea un generashon nobo di hóbennan den barionan ménos pudiente pa nan bira ehèmpelnan positivo. Favela Street ta lucha kontra e eksklushon sosial di e hóbennan di barionan ménos prudente i e loke nan ta usa pa logra esaki ta e futbòl di kaya.

Ta pone énfasis riba e talento di e hóbennan i ta mira nan komo héroenan. Ademas ta pone énfasis riba oportunidatnan potensial di edukashon i trabou pa nan. Favela Street ta konstruí un brùg entre e hóbennan aki ku sosiedat i ta ofresé nan e oportunidat di bida ku nan meresé. Favela Street ta kere firmemente den talento di e hóbennan aki. Roxanne Hehakaija a trese Favela Street Kòrsou i huntu kuné Salimatou Bah ku ta guia e hóbennan. Rocky ta direktora di e fundashon Favela Street. Ta trata di un hulandes kende su kara no ta un deskonosí, en partikular den e mundu internashonal di futbòl di kaya. Komo úniko miembro femenino di Street Legends, e mihó tim di futbòl di kaya na mundu, e tin un pashon pa futbòl di kaya, el a hunga den Jong Oranje. Simplemente den Rocky su sanger tin deporte ta kore.

 

 

Klousura di proyekto

Tur e hóbennan den e proyekto aki  a pasa un siman huntu i na e okashon aki a presentá nan eksperensia. Nos a papia un biaha mas ku Steph, Shuku i Rogier. Rogier a splika na e okashon aki a bisa ku debí na COVID-19 hopi kos a wanta i nan no por  a hasi muchu manera nan tabata ke. Ora COVID-19 a pasa e huntu ku e otro hóbennan a purba hasi algu tòg. Steph a bisa ku nan a bai de Pareltjes di Marnix, Albert Schweitzer i e mes personalmente a bai Johan Maurits serka e muchanan di grupo 7 i 8. Durante di nan presensia na e skolnan tabata hasi wega di mucha ku nan. I ku e muchanan mas grandi tabata hasi deporte manera slagbal i trèfbal. Loke Steph sinti ku e muchanan tin gana di hunga, esei e ta hasi ku nan.

 

Nan ta haña e akohida serka e skolnan i e hóbennan masha dushi. Ora nan yega skolnan, e muchanan ta kontentu i ta haña un reakshon inmenso serka e muchanan. I loke ta masha remarkabel ta ku nan mes di e grupo Favela ta hóbennan i e muchanan ta interaktá masha bon kuné.

Bale la pena

Pa loke ta nan propio eksperensia ku Favela Street aki na Kòrsou. Nan a enfatisá na Djasabra ku ta bale la pena e proyekto aki sigui. E proyekto aki a saka hopi mucha for di kaya i duna nan algu positivo pa hasi. Ta siña e muchanan kon atendé ku otro, esta hóben ku hóben na un manera sano. Tin biaha, serka mucha muhé nan tin di bai mas intensivo. Serka mucha hòmber ora aserka nan pa futbòl mesora nan tei, pero serka mucha muhé nan ta tímido pa hasi. Pero ora splika nan i laga nan mira, nan ta haña un akohida tremendo serka e mucha muhé nan. I nan mes esta Steph i Shuku komo damanan tambe hungando futbòl ta un ehèmpel pa e otro muchanan na skol ku ta mucha muhé tambe djòin nan. I tin mas hóben den Favela ku ta den tim.

 

Nada pòrnada na kas

Siendo den Favela street bo no ta keda gewon na kas pero huntu nan ta hasi hopi. I ora Rocky tei nan ta hasi aún mas. Nan ta bai hunga bala na Skalo, nan ta bai skol hasi spèl ku e muchanan. Ku Favela Street nan no ta keda pòrnada na kas pero e ta kita nan for di kaya pa hasi útil ku bo tempu liber.

Uni asta den “Lockdown”

E grupo ku a kuminsá ku Favela tabata 26 pero na final nan a terminá ku 13 hóben so. Na kaminda tin vários ku a kai afó. E interes tin di bin di bo mes asina e hóbennan a splika. Nan a bisa ku tin hende no a kustumbrá ku hopi disiplina i tin hende ta sinti ku ta ko’i kèns òf ku no gusta otro hóbennan den e grupo i esei ta pone ku e grupo ta apartá i hende ta kai afó. I asta den e temporada di “lockdown” nan a keda uni nan ku nan. Nan tabatin grupo di app ku ta stimulá otro i un bia pa luna nan tin enkuentronan riba zoom huntu ku Rocky for di Hulanda.

 

Nos ta tuma Favela Street over

I ademas di tabata asina intensivo beisig ku e proyekto, tur e hóbennan a sòru di sigui ku skol i kaba ku nan lèsnan manera mester ta. Nunka Favela Street a stroba nan ku nada. I p’esei despues di e klousura, e tres hóbennan aki lo kontinuá. Nan a bisa Djasabra ku esei ta nan meta pa nan keda ku Favela Street sin Rocky. Esaki ta nifiká ku nan mes por atendé ku e grupo i stimulá mas hóben pa nan tambe ta den Favela Street. I nan ta determiná ku nan lo logra manera Favela Street Kòrsou.

Favela Street ta dushi

No ta simplemente bin hunga futbòl i pasa dushi. E ta mas pa bin i siña hopi kos, bo ta siña kon atendé ku otro hóbennan. Si bo bin den Favela Street lo ta un eksperensia nobo pasobra na Kòrsou no tin algu asina aki.  No ta simplemente un klup di futbòl pero ta siña huntu ku otro, ta hasi weganan, Favela Sytreet ta dushi! I Favela ta engrandesé un hóben.

 

Por tuma konta ku [email protected] pa mas informashon. Tambe por sigui nan riba Facebook Favelastreet.

 

LAGA UN KOMENTARIO

Please enter your comment!
Please enter your name here