E ‘influencer’ Charlie Kirk i e sospechoso pa e asesinato, Tylor Robinson.
WASHINGTON (AFP).- Donald Trump ayera a duna di konosé di ta konsiderá pa deklará e organisashon “Antifa” komo un organisashon terorista na Merka si esei ta nesesario, segun tin avanse den e investigashon pa asesinato dje ‘influencer’ konservador norteamerikano Charlie Kirk. E ADN hañá na esena dje krímen ta koinsidí ku esun dje sospechoso Tyler Robinson, segun direktor di FBI, Kash Patel.
Robinson, di 22 aña, a entregá su mes na polis despues di un persekushon di 33 ora i ta spera ku pa wikènt benidero lo e keda akusá pa asesinato. Outoridatnan a bisa ku e sospechoso a usa un ‘rifle’ di un ‘sniper’ (frankotiradó) pa mata Kirk ku un tiru na garganta.
“Por konfirmá awe ku e ADN hañá na un sèrbètè den kua e arma tabata i e ADN na un skrufdrai a keda prosesá di forma positivo i ta korespondé na e sospechoso ku ta detené”, segun Patel na Fox News. Patel tambe a papia dje nota ku nan ta kere ku Robinson a skibi promé ku e krímen. E nota ta bisa, “básikamente mi tin e chèns pa eliminá Charlie Kirk i lo mi probechá di esei.” E nota ei a keda skibí promé ku e tiroteo, segun Patel a splika. “Aunke el a keda destruí, nos a haña prueba forense dje nota” den e kas familiar dje supuesto asesinato, segun direktor di FBI.
Segun ku e investigashonnan ta avansá ta surgi e teoria ku tin otro personanan kendenan tabata na altura ku Robinson lo a bai hasi algu, segun outoridatnan. Deklará Antifa, un koalishon di gruponan radikal ku presensia den otro paisnan, komo un grupo terorista “ta algu ku lo mi hasi si risibí apoyo di gabinete”, segun Trump a bisa na periodistanan.
“Nos lo bai dirigí tur e rabia ku nos ta sinti kontra e kampaña ku a kondusí na e asesinato”, segun e konsehero klave dje presidente republikano, Stephen Miller.
Relashon ku persona trans
Segun gobernador di UTAH, Spencer Cox, Robinson tabatin un relashon sentimental ku un kompañero di kuarto transgenero i a bisa di tabatin “ideologia iskierdista”.
Robinson a ekspresá su intenshonnan na un grupo amplio riba e ret sosial Discord, segun Patel. ”Tin un kantidat di persona kendenan lo keda interogá”, segun el a atvertí. E sospechoso pa e momento akí no ta kooperá ku outoridatnan, kontrario na su kompañero sentimental. E persona akí “no tabatin idea di loke e tabata pensa” i e ta dunando su kooperashon, segun e gobernador di Utah, Spencer Cox.
Robinson tabata un studiante briante, ku a krese den un famia di fe mormon. Tabata su tata mes ku a kompañ’é pa bai entregá na polis.
