WASHINGTON, USA (AFP).- E outor di intento di asesinato kontra di Donald Trump a aktua e so, segun polis federashon norteamerikano (FBI), ku a splika ku te ku ayera tardi “no a identifiká ningun ideologia”.
“Na e momento aki, e informashon ku nos tin ta indiká ku e outor dje tirunan a aktua e so”, segun Kevin Rojek, agente di FBI na Pennsylvania, kaminda e intento di asesinato a tuma lugá djasabra 13 di yüli.
E arma usá den e intento dje asesinato dje eks presidente norteamerikano i aktual kandidato presidensial, tabata un rifel AR 556, kumprá legalmente, segun Rojek a duna di konosé.
Nan ta kalkulá ku e arma semi outomátiko a keda kumprá pa tata dje outor di e tirunan, pero no a logra sa kon bin e hóben tabatin’e i si el a sali kas ku e arma sin konosementu di su tata.
FBI a duna di konosé ku lo investigá e intento di asesinato di Donald Trump komo un posibel akto di terorismo interno.
“Nos ta investigando e insidente komo un intento di asesinato, pero tambe ta konsiderá komo posibel akto di terorismo interno”, segun Robert Wells, sup direktor di divishon antiterorista di FBI.
