WASHINTON, AP.- FBI a anunsiá un investigashon djaluna di e forma kon míles di e-mail di Komité Nashonal Demókrata a wòrdu di hack. Esaki ta un akshon ku segun e ekipo di Hillary Clinton, a keda lansá pa Rusia pa asina benefisiá Donald Trump.
Den un komunikado, e agensia a konfirmá ku ta investigando un intrushon sibernétiko ku ta involukrá CND i a agregá ku “un echo asin’aki ta algu ku nos ta tuma hopi na serio”.
E-mailnan filtra djabièrnè pa WikiLeaks a sugerí ku CND a faboresé Clinton riba Bernie Sanders den elekshon primario, loke a pone partidarionan di e senador rabia ku durante hopi tempu a reklamá ku e komité a pone su dede pa balansá primarianan. E ekipo di Clinton a denunsiá un intrushon masivo den kòmpiuternan di e komité demókrata den luna di yüni i a atribuí esaki na firmanan di seguridat di e gobièrnu ruso.
E hefe di kampaña di e kandidato virtual, John Podesta, a kalentá e debate di djaluna bisando ku “tin un espesie di ‘bromance'” entre e presidente ruso Vladimir Putin i Trump, usando un término ku ta hasi referensia na un amistat eksepshonalmente serka entre dos amigu. E kampaña di Clinton a bisa ku Rusia ta di akuerdo ku e puntonan di bista di Trump, spesialmente esun di NATO.
Djaluna Trump a bisa ku e asirmashon di e ekipo di Clinton indikando ku Rusia ta yudando esaki filtra míles di e-mail ta un “chansa”.
E revelashonnan a pone ku e presidente di komité demókrata, Debbie Wasserman Schultz a renunsiá, e dia promé ku komienso di konvenshon di e partido na Philadelphia, kaminda Clinton mester aseptá e nominashon pa presidensia ofisialmente.
Te ainda no ta kla kon WikiLeaks a haña akseso na e e-mailnan.
Djaluna e kampaña di Clinton a sigurá ku Rusia tabata involukrá.
Na final di aprel, dirigentenan di e Partido Demókrata, a haña sa ku su sistemanan a keda ataká despues ku a deskubrí softwarenan malisioso den nan kòmpiuter.
