WILLEMSTAD.- Presidente di AMAK, Sr. Manfred ‘Feco’ Gomes tambe a duna su reakshon riba e situashon di kobransa di ‘royalties’ dor di DUCAPRO.
‘Na promé lugá nos (AMAK) a keda pa yama un reunion djaweps awor kaminda lo buska un persona profeshonal pa duna un presentashon i detaye relashoná ku e tema.
Mi ta di akuerdo ku mester pone un balanse pa e derechi di outor. Na Kòrsou nos konosé esaki kaba, radio i televishon ta paga pa derechi di outor pa Festival di Tumba, pero nos ta bibando den un komunidat relativamente chikí pa bo bai introdusí pago di ‘royalties’, mi no sa ku esei ta benefisioso pa e kompositor.
Kada kompositor ta riba su mes, e tin derechi di afiliá, bentaha e tin ora bo ta afiliá bo tin oportunidat pa haña algu bèk, pero den e kaso aki si bo afiliá na e organisashon aki bo ta haña bu den konfrontashon ku radio i televishon lokal. Esaki lo trese ku nan tambe ta kuminsá kobra pa promové bo produkshon. Den e kaso aki, ora e radio i televishon paga e suma, un montante grandi ta sali fo’i Kòrsou i ta un montante chikí ta bini bèk’. Finalmente Feco a indiká ku aworakí no ta e momentu pa nos bai introdusí esaki na Kòrsou.
