WILLEMSTAD.- Dianan 28 i 29 di yüni un biaha mas Kòrsou ta esenario prinsipal den Caribe ora ku artistanan di renombre presentá! “Hak’e Curaçao Summer Festival está caliente!” Un fin di siman kayente, yen di swing, hopi goso i kansionnan pa kanta henter anochi. Hak’e Curaçao Summer Festival lo ta un biaha mas, un espektákulo total ekipá ku su foodcourt i funzone, su balkon pa VIP i e área di mas grandi pa e públiko ku masalmente lo bishitá Curaçao Airport Venue. Un wikènt pa públiko lokal i e gran kantidat di bishitantenan for di islanan ruman gosa i baila nònstòp.
Dianan 28 i 29 di yüni próksimo lo tin un goso total i un ambiente festivo ku presentashon di FEID, Servando y Florentino, Olga Tañón, Tributo Al Merengue feat. Fernando Villalona, Wilfrido Vargas i Kinito Mendez. Tambe lo tin presentashon di Kòrsou su propio talentonan Axel & Orchestra ku despues di hopi petishon di públiko ta bolbe esenario di HCSF. Tambe, e aña aki lo tin presentashon di e sensashon musikal NSTYPLY!
Djabièrnè dia 28 di yüni
Djabièrnè lo presentá Olga Tañón, Tributo Al Merengue feat. Fernando Villalona, Wilfrido Vargas, Kinito Mendez y Orquesta i tambe Axel & Orchestra. Ta premirá un anochi fenomenal ku ambiente tropikal i ku lo inspirá baile sin stòp. Olga Tañón e berdadero diva di merengue lo ta espektakular kantando tur su hitnan. Miéntras Fernando Villalona, Wilfrido Vargas i Kinito Mendez lo presentá un Tributo Al Merengue kompañá pa nan orkesta. Axel & Orchestra lo tin un repertorio kayente p’asina bolbe sorprendé bishitantenan di Hak’e Curaçao Summer Festival.
Djasabra dia 29 di yüni
Djasabra ta pa FEID, Servando y Florentino i NSTYPLY. E anochi aki lo ta unu impaktante sigur. FEID resientemente a keda premiá ku 6 premio Latin AMAs e ganador di mas tantu premio riba e anochi i ku a bin ta yena diferente stadion konsekutivamente den Latinoamérika lo ta aki na Kòrsou!
E tin un siguimentu di 13.7 mion i ta e artista di reggaeton mas popular aktualmente, e lo presentá un sin fin di hit. Riba e mesun anochi aki tambe lo presentá e duo salsero ku mas swing Servando y Florentino. Kòrsou ta enamorá di nan kansionnan i próksimamente lo presentá tur hit ‘fei Salserin te Hermanos Primera’. Ya kaba ta risibiendo masha hopi reakshon di públiko den Latinoamérika!
NSTYPLY a kibra tur rèkòrt den benta pa konsierto lokal i riba e anochi aki nan lo tin un produkshon spesial ku sigur lo ta tremendo!
Benta di Karchi ta start djamars dia 7 di mei. Lo tin un spesial pa tur fanátiko na balor di 85 florin pa dia, pa despues kuminsá ku early-bird general 100 florin, ku despues lo bira 150 florin pa dia. Un pakete pa ámbos dia lo ta 175 florin (limitá). Pa informashon di VIP sekshon Balcony òf Platinum por tuma kontakto na: +5999-5209700. Karchi ta optenibel na Ticketpoint Zeelandia, Mensings, 24 Uur Uit De Muur, Van den Tweel òf www.hakecuracao.com
