Riba e kombinashon di potrèt por mira e situashon ku a surgi despues ku e fèri a boltu dilanti kosta di Nort Chipre.
NORT CHIPRE (AFP).- Por lo ménos ocho persona a muri i 17 ta pèrdí despues ku un fèri kargá ku 267 persona na bordo a senk dilanti kostanan di Nort Chipre, segun outoridatnan lokal a deklará na prensa turko. Te ku ayera no a determiná e kousa dje aksidente, pero un pasahero reskatá a deklará na prensa di a skucha un eksploshon promé ku e fèri a bòltu.
E kapitan dje fèri a keda detené despues ku esnan ku a sobrebibí a papia riba medidanan di seguridat defisiente ku tabatin na bordo, entre kua sigur ku no tabatin sufisiente chaleko salbabida i tampoko asistensia di parti di tripulashon.
“Algun hende mester a bula den laman sin salbabida. Tabata en berdat un lucha pa sobrebibí”, segun un dje pasaheronan a duna di konosé.
E fèri tabata transportá 267 pasahero i te ku ayera nochi ainda tabatin 17 persona perdí. Segun e Promé Minister dje Repúblika turko, Una Ustel, ademas de kapitan tambe a arestá otro shete tripulante. E fèri a bòltu djis desde di a sali for di haf di Kyrenia rumbo pa e siudat turko di Tasucu. Riba imágennan transmiti na televishon turko por a mira e fèri di bòltu, ku personanan bistí ku chaleko salbabida riba e kasko dje barku.
Vários barku dje zona a akudí pa duna asistensia. Repúblika Norte di Chipre, rekonosé únikamente pa Turkia, ta kontrolá e parti nort dje isla di Chipre, dividí for di 1974.
Ankara a okupá e parti aki dje isla e tempu ei komo reakshon riba un gòlpi orkestá pa Atenas, ku e meta pa aneksá e isla di Gresia.
Aktualmente ta solamente Repúblika Turko di Nort Chipre ta konta ku konekshon aéreo i marítimo ku Turkia.
