WILLEMSTAD.- Djamars 2 di yüli lo tin e di dos edishon di ‘Festival di Pueblo’ organisá pa Fundashon Bon Intenshon.
E festival ku aña pasa a resultá un éksito kompletu den kayanan di Otrobanda a bira un tradishon i pe aña aki tur kos ta praktikamente kla pa brinda pueblo di Kòrsou su ‘Festival di Pueblo’ den kuadro di selebrashon di Dia di Bandera.
Meskos ku aña pasá lo sera kaya na altura di Netto Bar den Breedestraat Otrobanda te ku Brionplein. A lo largu di e ruta lo tin diferente stènt ku lo bende artesania lokal, kos di boka dushi i mas.
5 TARIMA
Lo tin un total di 5 tarima kaminda lo tin presentashon di vários artista. E tarimanan ku tin nòmber di nos baluartenan lokal lo ta situá na: 1. Landslotterij – ‘Boy Dap’; 2. Viadukto Otrobanda – ‘Macaai Prudencia’; 3. Plenchi di Misa Santa Ana – ‘Elis Juliana’; 4. Na altura di Edifisio Jopi – ‘Rudy Plaate’ i 5. Riba Brionplein – ‘Doble R, Rignald Recordino’.
ANIMASHON MUSIKAL
Riba e tarimanan menshoná lo tin animashon musikal di entre otro: Grupo CCC; Tipiko Amigos; Grupo Komper; Grupo den Dam; Típiko Rozal; Curacao Steel; Krea Dansa; Boy Wout & Co.; Típiko pa tin Pret.
Riba plenchi/ kura di Misa di Santa Ana, riba tarima Elis Juliana lo tin presentashon di gruponan di baile D’Art i Memoria di Kòrsou huntu ku presentashon di Drumsquad, Crisen Schorea i su 8.40 i Incredible Events.
BRIONPLEIN
Tur aktividat i presentashon riba e tarimanan ta poné pa kaba 6.30 pm i pa 7 or lo sera ‘Festival di Pueblo’ ku un konsierto di Gentz riba Brionplein.
No tin duda ku e di dos edishon di ‘Festival di Pueblo’ un biaha mas lo atraé un kantidat di públiko den kurason di Otrobanda dia 2 di yüli próksimo.
