Lo bai tin un kambio den sakamentu di e finalistanan pa djabièrnè. Originalmente despues di e promé tres dianan preliminar, tabata saka 30 finalista pa partisipá djabièrnè.
Debí na reklamo di esnan ku tabata bisa ku djaluna ta friu, nan a ser vota friu i e kantidat di finalista ta ménos ku e otro dianan preliminar, e komishon a bin ku un proposishon, ku ta trese un balanse mas hustu.
A akordá pa trese un kambio i duna esnan ku a sali entre number 26 pa 35 un di dos oportunidat, esta den un sistema di “wildcard”.
Ta asina ku despues di e promé tres dianan, ta saka 25 finalista den un forma direkto i tambe 10 komposishon (26 te 35) ku lo partisipá den e “wildcard”..
Djaweps dia 30 di yanüari, entre 7or pa 9 or, mediante di e grabashon video, di e presentashon dje 10 komposishonnan ku sea djaluna, djamars o djárason, a kai den e “wild card” pa bolbe presentá riba screen riba stage di Curaçao Festival Center.
E mesun kuerpo di hurado lo bolbe pasa e 10 kansionnan aki i for di nan lo saka 5 ku skor mas haltu i ku lo uni ku e 25 nan ku ya a klasifiká,pa asina ei kompletá 30 tumba.
E djaweps dia 30 di yanüari lo ta un dia èkstra, kaminda e públiko lo por drenta Curaçao Festival Center grátis, pa asina ei presensia e “wildcard” aki. E mesun struktura di votashon lo tuma luga i nan lo keda husga un biaha mas.
E aktividatnan normal di djaweps ku ta presentashon di mantel i sakamentu di órden di presentashon pa djabièrnè, lo kuminsá 9or di anochi pa 10or.
Esaki ta un kambio positivo, kaminda ta duna e 10 tumbanan ku a skor mas haltu despues di 25 e oportunidat pa hurado skucha nan un biaha mas i e mihó 5 nan ta djòin e 25 finalistanan ya konosí pa djabièrnè.
