Tabatin konfiskashon di mariwana i 42 bala skèrpi di diferente kaliber
WILLEMSTAD.- Di akuerdo ku medidanan relashoná ku COVID-19, riba djadumingunan mester ta dia ku ta liber di tráfiko. Pero semper tin hende ku no por mantené nan mes na e regla i banda di esei ta falta ku leinan di tráfiko tambe.
Tabata alrededor di 12.25’or, ora ku un unidat polisial a tuma nota ku shofùr di un vehíkulo tabata pone ‘fever’ den Montaña Abou.
E unidat kumpliendo ku nan trabou di mantenshon di órden públiko a a duna e shofùr òrdu pa para, pero manera tabata di antisipá, esaki a sigui kore. Esaki a resultá den un persekushon kaminda ku e shofùr a stashoná e vehíkulo den kurá di un kas den Kaya Berom, pa despues baha bai paden.
E unidat ku tabata tras di e shofùr ku no a duna oido riba nan òrdu pa para, a pidi refuerso ku a yega na gran kantidat i a rondoná e bibienda.
E polisnan atento a tuma nota ku djis despues un hòmber a sali di porta di patras di e kas ku intenshon pa hui, pero e polisnan a rekonosé e hòmber aki komo e shofùr di e outo i logra detené.
E hòmber aki tabatin un tas den su poder i den e tas polis a haña kasi 1 kilo di mariwana, 9 bala skèrpi kaliber 22, 15 bala skèrpi kaliber 45 i 18 di kaliber 38. Pues na total 42 bala skèrpi di e diferente kalibernan.
Despues a tene un entrada hudisial na e kas enkuestion i a konfiská algun planchi di mariwana i un pistol di airsoft.
Esaki a kondusí na detenshon di e hòmber sospechoso S.C.J. nasé na Kòrsou en konekshon ku violashon di lei di arma di kandela i lei di opio.
Durante di e entrada hudisial a detené tambe e hòmber sospechoso C.M.V. di 20 aña nasé na Kòrsou pa e echonan ariba menshoná i tambe pa menasa i insulto di agentenan polisial.
A presentá ámbos sospechoso dilanti di un fiskal ouksiliar ku a ordená nan enkarselamentu pendiente di mas investigashon
…Riba e kombinashon di foto por tuma nota di e kantidat di patruya di polis ku a akudí na e kas di e sospechoso i tambe momentu dia resto di un di e dos sospechosonan i tambe konfiskashon di un pistol arma “airsoft”…
