FFK ke kontribuí ku 250 pakete di sosten na komunidat

WILLEMSTAD.- Federashon Futbòl Kòrsou (FFK) a tuma e inisiativa pa duna un man den e situashon ku vários kas di famia ta pasando aden pa motibu dje situashon ku a surgi ku coronavirus. E meta ta pa parti 250 pakete di sosten ku komestibel pa famianan den nesesidat.

FFK ta hasi un yamada na klupnan pa kada un skohe 6 persona den nan seno, bario i famia pa regalá un pakete i kumpli un un deber sosial komo rumannan den futbòl tambe tin pa yuda otro. Klupnan miembro di FFK por a pasa na ofisina kuminsando for di ayera i tuma e 6 paketenan destiná pa kada klup. Ta hasi un petishon pa presentá bistí ku shirt di klup.

E federashon ta trese dilanti ku Kòrsou ta enfrentando momentonan difísil, den tempu di e pandemia nobo ku ta COVID-19. FFK ta sigui e filosofia di FIFA, ku ta bisa ku futbòl mester mustra solidaridat i union globalmente na e momentonan aki. Demostrando ku por traha huntu komo famia den futbòl i komo un team.

Mas aleu FFK ta trese dilanti ku nan tin un obligashon i deber sosial na nos komunidat, siguiendo akuerdo i filosofia di FIFA. “Nos tambe ta kombibí ku nos miembronan den e tempu difísil aki. Yudando otro nos ta mas fuerte den bida i tur kos ku nos hasi, p’esei Direktiva di FFK kièr duna nos rumannan den futbòl un man. “Kontribuíndo ku nos granito den forma di 250 pakete di sosten, ku komestibel varia pa sostené famianan den nesesidat”.

Den kuadro di e inisiativa aki FFK tin un responsabilidat sosial firma ku FIFA, ku direktiva ke kumpli kuné stipulá den e Contract of Agreed Objectives “CAO” bou di e artíkulo Capacity Building i kondishonnan stipulá den FIFA Forward Regulations 2.0 Article 6 par 4 b.

Pues di e manera aki, federashon nashonal di futbòl huntu ku su klupnan ke duna un man na komunidat.

SHARE

LEAVE A REPLY