WILLEMSTAD.- Federashon Futbòl Kòrsou (FFK) ta suprayá ku karchinan di entrada pa e weganan di Kòrsou durante fase di grupo di Mundial, te awor por wòrdu solamente optené via e portal ofisial di ticket di FIFA: https://fifa-fwc26-us.tickets.fifa.com. Corendon no ta bende karchi separá pa wega; solamente paketenan di biahe i estadia. Kualke interpretashon òf publikashon tokante benta di ticket di wega via Corendon òf via un FFK-tickets booth ta inkorekto.
FIFA ta permití un máksimo di kuater (4) ticket pa kada kas. Debí na e demanda grandilo tin un “FFK-tickets booth” na Capital C, riba djárason 17 di Desèmber. Aki fanátikonan por registrá pa ticket adishonal riba e máksimo determiná pa FIFA. Tene kuenta esaki ta solamente un inskripshon i no un benta di ticket.
Basá riba informashon ku FFK tin te awor, FFK lo risibí en prinsipio un kantidat limitá di ticket komplementario di FIFA: 2 VVIP, 8 VIP, 20 asiento tékniko pa e staf i 50 ticket di kategoria 1. Ademas, FFK por kumpra 1.050 ticket den e Football Community Allocation, di kua 852 lo ta disponibel pa fanátikonan ku tin un pakete di Corendon. E repartishon ta 700 ticket di kategoria 1, 200 di kategoria 2 i 150 di kategoria 3. E repartishon aki ta segun determinashon di FIFA. Den konsulta ku Corendon, FFK lo wak si e repartishon aki por wòrdu kambia, ku e meta di hasi mas ticket di kategoria 3, e kategoria mas ekonómiko, disponibel.
Un di kuater kategoria di ticket ta e asina yamá Ticket Allocation Groups (TAG). Mínimo 30% di e alokashon pa fanátiko mester ta destiná pa fanátikonan, miéntras máksimo di 70% por wòrdu destiná pa TAG. TAG mester ta organisashonnan afiliá ku futbòl i no por ta entidatnan komersial. Bou di TAG ta kai klupnan ku ta partisipá den kompetensia lokal di futbòl, kompetensia di futbòl femenino òf di hóben, i asosiashonnan di rèfrinan.
FFK lo tin mañan djárason 17 di Desèmber mainta, un reunion pa medio di video ku e funshonario responsabel pa ticketing di FIFA. Riba djaweps, 18 di desèmber, lo tin un konferensia di prensa kaminda e informashon mas aktual tokante ticket di WK via FFK lo wòrdu kompartí.
