RIO DE JANEIRO, AP.- E medidanan mas estrikto di seguridat implementá djaluna den aeropuertonan brasilero a derivá den filanan largu i asta retraso di algun buelo. Falta ménos di tres siman pa Rio de Janeiro sirbi komo anfitrion di Weganan Olímpiko.
Desde 6’or di mainta, por a mira filanan largu i kaótiko den e aeropuerto regional di Congonhas den Sao Paulo, e siudat mas grandi di e pais. mei ora despues, tabatin mas di 700 persona wardando den e promé i segundo piso di e edifisio, pa pasa pa kòntròl di seguridat.
Durante atardi, e filanan tabata ménos.
E aeropuertonan mas chikí na otro sitionan di e estado di Sao Paulo, na sùit di Brasil, a registrá vários problema.
Tabatin filanan largu den e aeropuerto regional Santos Dumont di Rio de Janeiro, e siudat kaminda Wega Olímpiko ta keda inougurá dia 5 di ougùstùs.
Pero te ainda, no a reportá afekshonnan den aeropuertonan internashonal.
E medidanan di seguridat ta drenta den efekto algu dia despues di e atake ku un trùk na Nice, kual a laga 84 morto na Fransia.
Esaki a generá preokupashonnan di seguridat durante susesonan grandi.