… Hunneley Felicia …
WILLEMSTAD.- E final di Festival di Tumba ta kuminsá pa 7or di anochi. Lo no tin “showtime” ta start mesora ku e parti ofisial. Tur banda lo tin “warm-up” i su durashon lo ta 2 minüt.
E homenahe pa Doña Elia Isenia na kende e festival ta dediká, ta tuma lugá mas o ménos mei mei dje programa asina Hunneley Felicia a indiká. Segun Hunneley a base di kalkulo ku a wòrdu hasí e festival lo terminá 2.30 di mardugá.
TRANSMISHON
Gino Valeriaan a indiká ayera nochi ku AMAK a hasi invershon pa por transmití Festival di Tumba via TeleCuraçao i TVDirect. Di forma enfátiko Gino a bisa ku AMAK a paga TeleCuraçao i TV Direct pa pasa e transmishon. Ku esaki tur informashon ku tabatin riba retnan sosial a keda barí for di riba mesa.
‘AMAK a studia su kosnan kon e ta hasié’, asina Gino a indiká.
Pa esnan ku lo wak, Gino a garantisá ku lo tin un produkshon na nivel pa tur hende por ta felis. ‘Boso tei mira e kalidat di transmishon’.
BALORA
Ku Festival di Tumba e aña aki ta den boka di tur hende ta debí na e trabou desplegá pa entre otro Reshapers. ‘Tur hende ta papia di tumba i esei a yuda grandemente den benta di karchi pa Festival di Tumba. Red Carpet ta praktikamente “sold out”, miéntras ku tin karchi pa sekshon general na benta. Ainda bo por kumpra ‘pay per view’. E ta yuda generá fondo pa por krese e festival. Esaki ta importante, paso e hende ku ta krea ei, bo mester balor’é’, asina Gino a terminá bisando.
– … Gino Valeriaan …
