PARAMARIBO, SURINAM, AFP.- Djamars fiskal di Sürnam a eksihí un sentensia di 20 aña di prisòn kontra e èks presidente Desi Bouterse, huzgá pa asesinato di 15 opositor na 1982,
E èks diktador a mustra relahá na salida di korte i a hasi un chansa dilanti di prensa: “Si nan detené mi, lo mi bisa nan: ‘no lubidá ku mi ta huma Morello (marka di sigaria), trese sufisiente'”.
Miéntras tantu, e fiskal general interino, Astrid Niamat, a pidi pa ratifiká e kondena di 20 aña. “Mirando e planifikashon, violensia partikular i atrosidat di e asesinato di 15 víktima, tin tur motibu pa pone e sentensia aki”.
“E akusado a asesiná ku 15 víktima ku violensia severo. El a pone fin na bida di 15 hóben”, asina el insistí. Tambe konsiderando ku “e akusado” no tabata “ekspresá arepentimentu” ni “tabata kier a asumí responsabilidat di su aktonan, inkluso responsabilidat polítiko”.
Bouterse di 77 aña a bisa ku “Fiskalnan ta duna nan mes opinion i no ta komprondé kon e kaso aki a sosodé i nan ta purba di presentá esaki di un manera diferente ku loke a pasa berdaderamente”.
Na fin di mart, su abogado a pidi apsolushon pa Desi, ku ta konsiderá ku ta “sabi i un akto di patriotismo pa pone fin” na e kaso kontra Bouterse, kende semper a ninga su partisipashon den e asesinatonan di 15 e opositornan.
Na prinsipio di yanüari, Bouterse a atmití ku el a tende tiru riba e dia di e krímennan, pero a ninga ku el a duna e òrdu pa ehekutá e opositornan. El a sigurá ku el a plania ekspulsá nan, señalando nan di prepará un kontra gòlpi ku ayudo di CIA.
Bouterse a wòrdu kondená na 2019 pa 20 aña di prizòn pa e asesinatonan di abogadonan, periodistanan i empresarionan den desèmber di 1982, dos aña despues ku el a yega na poder despues di un gòlpi di Estado.
