WASHINGTON, USA (AFP).- E fiskal spesial Jack Smith a solisitá ayera pa para e kaso kontra dje presidente eligí di Merka, Donald Trump, pa supuestamente a konspirá pa kambia resultado di elekshonnan di 2020 ku el a pèrdè kontra di Joe Biden.
Dilanti di hues di distrito ku a presidí e kaso, Smith a trese dilanti ku mester ‘drop’ e kaso den kuadro di un polítika di Departamento di Hustisia di no prosesá un presidente den funshon.
El a pidi e hues Tanya Chutkan pa pone e kaso un banda, pero a laga habrí e posibilidat ku por start e kaso bèk una bes Trump baha komo presidente, den komienso di 2029.
Algun dia despues ku e magnate konservador a derotá Kamala Harris den elekshonnan presidensial di 5 di novèmber, Smith dirèkt a anulá tur e fechanan riba e kalènder hudisial dje kaso.
E posishon di gobièrnu riba “e akusashon kontra di esun demandá no a kambia”, segun el a bisa dilanti di hues. “Pero e sirkunstansianan si”, el a agregá.
“Pa hopi tempu kaba, e posishon di Departamento di Hustisia ta ku Konstitushon di Merka ta prohibí un akusashon federal i tambe un kaso penal di un presidente den funshon”, segun e fiskal a splika.
“Komo resultado, e akusashon aki mester keda poné un banda promé ku e akusado asumí e funshon”, segun el a splika.
E direktor di komunikashon dje magnate republikano, Steven Cheung, a kalifiká komo “un gran viktoria pa e estado di derechi”.
E presidente eligí a keda akusá di konspirashon pa stroba un prosedimentu ofisial, ku ta e seshon di Kongreso pa a sertifiká e viktoria di Joe Biden.
Smith a yega di akusá Trump di a atendé di forma inkorekto ku dokumentonan ultrasekreto despues di a sali for di White House, pero e kaso ei tambe a keda poné un banda pa un hues federal na Florida ku e argumento ku e nombramentu dje fiskal spesial tabata algu ilegal.
Den luna di mei Trump a keda kondená na New York pa 34 akusashon di falsifikashon di registro komersial pa tapa e pago hasí na e aktris porno Stormy Daniel na vispera di elekshon di 2016 ku e meta pa evitá na revelá un supuesto relashon seksual.
E hues Juan Merchan a posponé e sentensia miéntras ku e ta konsiderá un solisitut di abogado di Trump pa e sentensia keda anulá pa desishon di Korte Supremo.
