Dalma Maradona (meimei), yu dje leyenda di futbòl argentino Diego Maradona i esaki su eks-partner, Veronica Ojeda (d), den sala di korte ayera na Buenos Aires.
SAN ISIDRO, Argentina (AFP).- E kaso penal nobo relashoná ku morto den 2020 dje astro di futbòl Diego Maradona a kuminsá ayera na Argentina, ku un fuerte akusashon di ministerio públiko kontra dje grupo médiko ku a atendé e strea argentino. Fiskal a kalifiká esaki komo “un grupo di hendenan improvisá” kendenan ta kulpabel pa deterioro di salú di Maradona. E ikono di futbòl argentino a muri riba 25 di novèmber di 2020 na edat di 60 aña, a kousa di un krísis di kardio i un problema di pulmon despues di vários ora di agonia drumí riba su kama den un residensia privá na Tigre, serka di San Isidro, kaminda e tabata rekuperá di un operashon.
Shete profeshonal di salú ku na e momento ei tabata atendé a keda akusá di homisidio, indikando ku nan tabata konsiente dje echo ku nan akshonnan por a kondusí na morto.
“Diego Maradona a kuminsá muri diesdos ora promé ku su morto di bèrdat. “Kualke hende ku lo a pensa pa traslad’é pa un klínika den su delaster siman lo a salba su bida”, segun e fiskal Patricio Ferrari.
“Ta trata di un grupo improvisá ku a kometé tur tipo di fout di un forma kruel, no profeshonal i ku falta di tur kos”, segun Ferrari.
E yunan di Maradona, Dalma, Gianinna i Jana, komo tambe su eks-partner Veronica Ojeda, tabata presente den sala pa tratamentu dje kaso.
E kaso penal nobo ta tuma lugá despues dje skandal dje kaso di 2025, anulá despues ku a publiká imágennan di Julieta Makintach, un dje tres huesnan dje tribunal, komo protagonista den un dokumental klandestino riba e proseso di kua el a forma parti.
“Hustisia Divino”: E skandal dje promé kaso den 2025 a laga sin efekto no ménos ku 20 oudiensia hudisial i 44 testimonio durante di dos luna i mei entre mart i mei.
Abogadonan i testigunan a keda asombrá, e hues a keda apartá i e tema a kubri titularnan na Argentina i rònt mundu.
Titulá “Hustisia Divina”, e dokumental a mustra Makintach kanando den gangnan di e tribunal i entrevistá den su ofisina. El a keda destituí den novèmber durante di un kaso polítiko. Esnan akusá ta enfrentá kastigu di entre 8 pa 25 aña di prizòn.
