WILLEMSTAD.- Ayera hues a dikta ku Fundashon Kas Popular (FKP) tin di paga un daño i perhuisio debí na desalohamentu inkorekto di un bienes di un siudadano ku tabata hür un kas serka dje. E siudadano aki ta sra. Ardieth Merien-Martha di Fundashon E Hende i su kasá.
Famia Merien a entamá kaso kontra di gobièrnu di Kòrsou i FKP kaminda ta pidi vários kompensashon kontra e fundashon.
T’asina ku Merien durante e periodo ku nan tabata hür e kas serka FKP, a realisá algun konstrukshon na e kas. Despues nan a pidi FKP pa kumpra e kas.
FKP a pidi Merien pa dia 19 ougùstùs 2011 pa dentro di 48 ora nan sali for di e kas òf saka loke ku nan tin den e kas, pasobra nan no ta biba einan. Ademas nan tin retraso di hür di kas i mas OB riba esaki. Dia 5 novèmber 2012, FKP a kuminsá ku e trabounan pa “sloop” e konstrukshonnan ku a keda hasí dor di Merien na e kas.
Dia 6 desèmber 2012, Merien a start ku un huisio sumario kontra di FKP pa para e trabounan di “sloop” e konstrukshon, pa FKP respetá e kontrato di hür ku no a terminá i ku FKP no por hür e kas ku otro persona. Den asuntu di “sloop” e konstrukshon, Merien no ta haña rason. Pasobra ora nan a hasi e demanda aki ya kaba a “sloop” e konstrukshon. Pero si nan ta haña rason ku FKP no a terminá e kontrato di hür korektamente. Tambe ku FKP riba su propio título a bai over na desalohá loke tabatin den e kas, loke ta kontra di lei.
Merien a pidi korte pa kondená FKP na paga Naf.107.318,48 pa trabou di “sloop”; kondená FKP na pago di Naf.167.102,50 pa desalohamentu tantu paden i pafó dje kas; pa FKP paga nan un suma di Naf.761,25 dor di debe di hür i OB di e kas; pa FKP paga Naf.247,50 ku ta gastu di dùrwarder; FKP paga 15% di gastunan di “incasso”; FKP paga interes legal for di 16 mart 2015 te ku 25 novèmber 2019 i finalmente FKP paga gastunan di e prosedura aki.
Gobièrnu a hasi apelashon riba “verjaring” di e kaso, pero korte a rechasá esaki.
E petishon ku Merien nan a hasi pa kobra FKP gastu di trabou di “sloop” loke nan a konstruí, a keda rechasá. Korte ta husga ku Merien tabata na altura ku e kas no ta di nan, i nan no ta bini na remarke segun e eksigensianan di lei pa por kumpra e kas. Pues nan no por hasi apelashon riba gastu di “sloop”.
Hues a honra Merien ku e siguiente suma, pa desalohamentu, kaminda nan a sufri daño i pèrdida di mobilarionan di gran balor pa nan, meskos dokumentonan importante ku tin un sentimentu emoshonal pa nan manera pasport, foto etc. E balor di e mobilario ku a keda saká for di den kas, ta di 30 mil florin; 5000 florin pa daño inmaterial ku nan a sufri, 2000 florin pa 4 luna di hür kas privá, fotógrafo ku a saka foto ta 500 florin, mas 500 florin ku nan a pèrdè relashoná ku konekshon di awa i koriente dje kas, mas 4000 florin. Tur esakinan ta akumulá un suma di Naf.42.000,00 mas interes ku FKP tin di paga Merien nan. Aparte di e suma aki, otro suma di Naf.761,25 debe di hür FKP tin di paga nan; i otro suma di naf.1875.-. FKP tin di paga e gastunan di e prosedura aki kual ta 4.413,50 florin, ta loke ku hues a dikta finalmente.

LAGA UN KOMENTARIO

Please enter your comment!
Please enter your name here