KRALENDIJK – E oumento di preis di transporte di karga den kònteiner di laman a para bira apsurdo. Den ún aña di tempu e flete di un kònteiner a bira kasi kasi kuater bes mas karu. Ta un situashon ku no por wanta mas i ku lo bai tin efekto serio riba e forsa di kompra di e konsumidó boneriano.

Na Kòrsou un komersiante preokupá a splika ku el a kaba di risibÍ oferta un par di dia pasá pa flete di ‘cooled container’ for di China na balor di USD 28.000,00. E mésun flete aki aña pasá tabata USD 7.500,00.

Lunanan atras kaba komersiantenan a bati alarma na Kòrsuu pa tene kuenta ku esaki i ku súplika pa kuminsá informá pueblo, pasobra e tempu ei e flete a subi i yega entre USD 13.000,00 i USD 15.000,00.

Na Boneiru e komersiante Xuwen, doño di e supermerkado Wing Cheung i importadó di produkto for di di China, a trese e preokupashon den publisidat, ku ta un fenómeno mundial.

Gobièrnu no tin masha influensia riba e desaroyo aki. Inisiativa ku gobièrnu por tuma ta di a lo ménos bini ku kampañanan pa konsientisá hende di e problema aki. Komo ku komo isla no ta produsi kasi nada nos mes, e isla aki lo keda afektá mas tantu ku un pais grandi.

“Mi ta kere ku nos mester realisá nos mes ku mester kuminsá baha man ku kumpra produkto for di China, òf produkto ku tin parti di e produktu (e empake por ehèmpel) ku ta bini for di China. Mester bai desvia pa otro merkado, por ta ku markanan ku nos no konosé. Pasobra si nos sigui teima na kumpra e mesun kosnan ku nos tin kustumber di kumpra den supermarket, nos no por soportá e subida di preis aki”, segun un opservador.

“Mester hinka mas esfuerso tambe den produsí kuminda nos mes. Komprondá di unda e subida di preis ta bin i ku esaki ta afektá produkto ku ta bin di tur pais. Pasobra no ta pasobra bo marka di kèchup ta merikano, ta nifiká ku e preis lo no keda afektá. Por ta e bòter di plèstik ku e kèchup ta bin aden, sí ta bin di China. Pa e motibu ei mester komprondé ku e problema aki ta un problema global. Kumpra konsiente i asina yuda aliviá e probelma pa nos tur.”

 

LAGA UN KOMENTARIO

Please enter your comment!
Please enter your name here