WILLEMSTAD.- Flow ta informá ku nan ta atendiendo e situashon di interupshon di servisio na Outoridat Regulatorio di Kòrsou (RAC). Flow ta indiká ku durante e último dianan, nan a skucha ku atenshon tur e preokupashonnan, frustrashon i desepshon ekspresá despues di e interupshon di servisio ku a surgi resientemente. E kompania ke pa su klientenan sa ku nan ta skuchando nan, i bos di klientenan ta sumamente importante pa nan.
Flow ta sigui bisa di a hasi un investigashon kompleto, a entregá un rapòrt detayá na Outoridat Regulatorio di Kòrsou (RAC), i ta atendiendo e suseso lamentabel akí mas aleu ku RAC.
E kompania di telekomunikashon ta komprondé kon importante nan servisionan ta pa bida diario dje kliente, i nan ta duna un deskuento boluntario i outomátiko di 15%, ekivalente na mas o ménos sinku dia di servisio, na tur kliente ku a keda impaktá.
Flow ta lamentá profundamente e inkumbiniensia ku e interupshon akí a kousa i nan ta realmente agradesido pa e pasenshi i komprenshon ku hopi di klientenan a mustra.
“Nos timnan a traha inkansablemente pa restorá servisio, i nos ta keda totalmente komprometé na transparensia, konfiabilidat i mehorashon kontinuo. Nos lo komuniká ku nos klientenan, gruponan di interes (stakeholders) i e públiko general, unabes ku e proseso di revishon di RAC ta kompletá. Mientrastantu, nos ke pa bo sa ku bo konfiansa ta nifiká tur kos pa nos, i nos ta trahando tur dia pa gana i mantené esaki”.
