CARACAS.- No ta parse ku den seno di militarnan na Venezuela tin muchu ánimo pa sostené oposishon. Opviamente un gran mayoria ta loyal na Nicolás Maduro. Militarnan na Venezuela a kritiká e apelashon ku oposishon a hasi riba nan pa forsanan armá duna nan sosten meimei di e disputanan ku tin relashoná ku e supuesto reelekshon di Maduro. T’asina ku lidernan di oposishon Edmundo Gonzalez Urrutia i Maria Corina Machado a hasi un apelashon riba “konsenshi” dje militarnan i tambe polis pa sostené oposishon.
Tradishonalmente e dos gruponan aki semper tabata loyal na Maduro, ya ku nan ta haña trato preferensial i ta hiba un bida dushi komo tal ta duru pa nan riska un aventura manera esaki. Al kontrali, oposishon ta ser konfrontá ku un grupo di korte kriminal ku ta investigando nan pa instigá pueblo, desobediensia, insurekshon i konspirashon. Den un deklarashon di “lealtat apsoluto” e Minister di Defensa i hefe di forsanan armá Vladimir Padrino a bisa ku nan ta rechasá e gritunan di desesperashon pa mina demokrasia di Venezuela.
