Situashon di bida na Haiti, prinsipalmente den kapital Port-au-Prince ta sigui komo algu teribel.
NASHONNAN UNI (AFP).- Un forsa multinashonal nobo pa kombatí gèngnan na Haiti lo biaha durante di próksimo lunanan pa Haiti, segun representante spesial di Nashonnan Uni Jack Christofides. “Nos ta den un fase inisial krusial pa forma e Forsa di Represhon di Geng (FRG), ku gradualmente lo sustituí e Mishon Multinashonal di Apoyo na Polis Haitiano (MMAS), segun e diplomátiko surafrikano, designá pa e grupo di paisnan sosio di FRG, ku tin Merka na kabes.
Un plan inisial aprobá resientemente pa Konseho di Seguridat di Nashonnan Uni tin intenshon di manda te hasta 5.500 efektivo militar i polisial den próksimo lunanan. E retiro di MMAS, ku na dado momento a konta ku komo mil agente, gradualmente lo baha miéntras ku e forsanan nobo ta drenta, evitando un bashí di seguridat de un pais ku ketu bai ta keda gòlpiá pa e violensia di gèngnan.
Christofides mas aleu a duna di konosé ku FRG “no ta un fin riba su mes, sino un medio pa permití ku e institushonnan haitiano ta rekuperá kontròl i ku nan ta krea e kondishonnan pa un stabilidat pa hopi tempu”.
Haiti for di 2016 no a tene un elekshon i esei debí na inseguridat. Segun e último informe di ekspertonan di Konseho di Seguridat riba e tema aki, e operashonnan polisial a logra pa frena e ekspanshon di gèngnan kriminal den e kapital, pero e situashon di seguridat ta sigui ta preokupante na e momento aki.
