GWER, IRAK, AP. – Ofensiva pa kita Mosul for di Estado Islámiko a disminuí djamars a medida ku forsanan irakí tabata avanse pa ost i sur i yega na aldeanan poblá pa sivilnan. E kombatiente kurdonan irakí, yamá “peshmerga”, den gran parti nan a hasi un pousa den nan ofensiva, segun nan komandante den e frente, ost di Mosul. E ophetivo tabata pa konsolidá e konkista lográ dianan anterior. Forsanan irakí a avansá pa sur i ost di Mosul, yegando den zona di al-Hamdaniya, un pueblo Kristian ku a duna refugio na desena di míles di habitante. Den sur, polis federal irakí a yega al-Houd, kaminda hopi persona ta biba segun ONU. Teniente koronel di ehérsito irakí Mohamed Shaker a sigurá ku al-Hamdaniya ta sera i ku su forsanan a konkistá otro seis aldea den último dianan. Mas di 25.000 efektivo a keda despachá pa e rekonkistá di Mosul, un operativo enorme ku probablemente lo tarda simannan òf lunanan. Ta di dos siudat mas grandi di Irak i ta sigui duna refugio na mas di 1 mion di habitante. Gruponan di asistensia ta atvertí ku un mion persona lo haña nan obligá na hui, loke lo provoká un krísis grave humanitario. ” E operativo ta desaroyá di akuerdo ku e plannan i nos tin gran éksito”, asina e teniente general di ehérsito irakí Qassim Al-Maliki a bisa. “E enemigu ta bati retirada pero esaki por laga unidatnan chikí di tres pa kuater efektivo atras, i nos ta bariendo esakinan”.
Djaluna último, forsanan kurdo a rekonkistá algun 200 kilometer kuadrat, di akuerdo ku Masud Barzani, presidente di zona outónomo kurdo irakí. Komandantenan peshmerga den e kampo di bataya ta kalkulá ku a retomá sinku aldea i ku a obligá Estado Islámiko na hala atras 8 kilometer. E frente di bataya na ost ta un 30 kilometer for di e siudat. Djamars mainta, e frente di bataya tabata trankil den su mayoria e siguiente dia di un avanse grandi di forsanan kurdo protehé pa bombardeonan merikano i bòmnan intenso.
“Nos simplemente ta retené e posishonnan”, asina koronel peshmerga Khathar Sheikhan a bisa.
“Ehérsito irakí awor ta avansá mas for di zonanan ku nos ta kontrolá”.
” Nos a logra nos ophetivo”, asina el a ekspresá. Un bosero di koalishon liderá pa Estádos Unídos a bisa ku e operashon lo prosedé di akuerdo ku e plan i ku e forsanan irakí ta logrando “un progreso ekselente”.
“No tin pousa algun den e operativo pa liberá Mosul. E tropanan ta avansando riba e vários frente rondó di e siudat”, asina e koronel John Dorrian a indiká. “Algun komandante a kumpli ku e mishon promé di loke a plania tras di topa ku resistensia ligero òf moderá”.
Na Baghdad, míles di siguidó den un klérigo chií a marcha djamars dilanti di embahada turko eksigiendo retirada di tropanan turko den un base serka di Mosul.
“Pafó, pafó, intruso!” I “si, si Irak”, tabata algun di e lemanan ku e multitut leal na e klérigo chií Moqtada al- Sadr tabata grita.
