Katherine Palacio ta konta
Katherine Palacio ta un persona ku un historia impreshonante. Su promé publikashon “Restaurada”, a lansa su trayekto den e mundu di literatura I tres aña despues e tin un total di 5 buki. Tambe el a ekspandé su trabou pa e mundu di fragansia.
Un outor ku su historia
Den tres aña, Katherine a logra publiká 5 buki. Su inspirashon pa e bukinan ta bini di Dios. “Ta Dios ta duna mi e talento, i tur lokual mi ta biba dia pa dia, ta inspirashon di e mundu spiritual,” Katherine ta bisa. Mi ta skibi pa hende ku ta kere den Dios, òf pa hende ku no ta lesa beibel pero ku ta habri pa risibí e mensahe. Katherine ta menshoná ku su buki no ta spesífikamente pa kristian, pero ta adresá pa esnan ku ta buska un konekshon spiritual. E ta ta skibi na un manera dinámiko i inovativo. “Hopi hende ta bisa: ‘No, mi no ta lesa e buki paso e ta laf’. Mi ta garantisá ku e bukinan aki ta dinámiko, i e lo por yuda bo tambe. E ta buta bo dilanti di un spil ku ta laga bo mira realmente kon bo ta den e momento,” Katherine ta agregá. E ta kompartí ku esaki ta su manera pa reflehá e lus di Dios den su buki.
Un mensahe profundo
Katherine ta probechá di e momentu pa menshoná ku “Restaurada” ta un historia hopi tristu. E ta konta kon el a desviá, pero tambe e ta laga e lektor sa kon el a bolbe namorá di un amor berdadero, un amor ku no ta laga bo kai ni maske kuantu bia bo faya òf desepshoná e: e amor di Dios. Danki na e amor di Dios, el a logra lanta. “I mi no a lanta djis pa kana, mi a lanta ku un propósito, ku ta hasi hopi diferensia”, e ta konta.
Katherine ta kontinuá ku “Las Drogas y el Evangelio” ta un konfrontashon di dos mundu. Nan ta hopi real. Droga i alkohòl ta kla pa tuma tur hende, pero e evangelio tambe ta kla pa restourá bo alma. Katherine ta menshoná ku e gusta futbòl. Ora el a yega Hulanda, su yunan a kuminsá entrená. Esei a lanta su pashon pa e deporte atrobe. Mané el a menshoná anterior, el a konektá e futbòl ku e evangelio. E ta bisa, ‘Mi a tuma e tarea di árbitro i siñá e trabou, paso mi yunan tabata tin hopi desakuerdo’. Komo mama, bo mester wak i aktua abase di akshon. Bo no por tin preferensia, bo mester traha bo reglanan i mantené bo mes na dje. Kada gòlpi ku bo risibí ta un lès pa sigui dilanti. Bo lo siña sigur algu for di e buki aki.
E siguiente buki ta “Tradishon Navideño”, un obra di 24 dia pa preparashon di selebrashon di Pasku. Tur dia bo lo siña ken Hesus ta i dikon nos ta selebrá e fiesta aki. Kiko ta su nifikashon real? Awendia, hopi hende ta kambia e selebrashon di Pasku, pero nos mester bai bèk na e selebrashon tradishonal. E buki tambe tin diferente wega ku bo por hunga ku bo famia i amigunan.
E último buki, “Rompiendo Silencio”. Ta un buki diferente pero ku mesun direkshon. E ta rekompilá historia i testimonio di hendenan, i tin un par ku Katherine mes no konosé. Nan a tuma kontakto ku e via Facebook i Instagram, nan tabata tin mester di un persona pa skucha nan. Loke nan ta enfrentá, pa nan por haña un konseho of un simpel Dios ‘bendishoná bo’.
Mundu tin mester di Dios. I ora hende ta enfrentá situashonnan difísil, si nan ta keda den silensio, nan ta sufri. Asina bo ta deprimí bo mes i bo ta keda manera un anker. Mester kibra e silensio, pero di un manera sabi. Bo no por papia ku tur hende tampoko. Bo mester buska hendenan ku por yuda bo lanta i no pusha bo abou.
Den e buki aki bo tambe lo topa ku Katheirne su testimonio. E ta un historia hopi fuerte, paso e ta toka tema di maltrato. Ora nos tende e palabra maltrato, nos ta pensa mesora riba abuso físiko, pero tin maltrato ku no ta visibel. Tin biaha nos, komo mayornan, ta bisa nos yunan sierto palabra ku ta laga marka, manera ‘Bo no ta sirbi’. I e palabranan ta keda den e yu su kurason. Ta un maltrato ku no ta kita fásil.
Kontrolá bo sentimentu
Katherine ta enkurashá hende pa kontrolá nan sintimentu nan. Por komprondé ku bo ta rabia, pero bo mester siña kontrolá i no papia ora bo ta rabia. Paso ora bo ta rabia, bo ta buska manera pa hasi otro hende dolo. Tin diferente tipo di maltrato, i e buki lo amplifiká riba nan. Awor tin un fundashon Kibra e Silensio, Katherine ta bati man pa nan. ‘Maltrato mester desaparesé’, e ta bisa. Nos a wòrdu yama pa ta liber, i e buki aki ta mas ku un buki, ta un guia pa esnan ku a yega di ta silensia. Hopi biaha nos grandinan ta bisa: ‘Palabra ta hasi mas dolo ku un arma mes’.
Nos mester siña kon pa dominá nos mes i no papia ora nos ta rabia, paso e rabia por lanta palabra ku nos no kemen. I una bes ku nan sali for di boka, ta difísil pa tuma e bèk.
E mensahe ta kla: kibra e silensio, pero hasi esaki ku sabiduria i guia di Dios.
E kreadó di perfume Dushi
Dushi: Un liña di perfume, ku ta hole dushi pero alabes ta promové Kòrsou. Katherine Palacio komo su kreadó ta splika kon el a yega na e fragansia aki.
Katherine ta konta ku e idea a kuminsá 2 aña pasa. El a nanse dor di e buki “Las drogas y el Evangelio”. Katherine tabata parti e bukinan aki pòrnada pa hende miéntras ku e mes tabata kubri e gastunan. Tabata tin un momento ku el a keda blo bashí I no por a sigui hasi e grasia di parti e bukinan pòrnada. Segun boluntat di Dios, el a risibí e idea: Dushi. Katherine ta splika ku e nòmber Dushi tin un historia su tras. Katherine a nanse na Colombia, e stima Colombia, su mayornan ta di Colombia. E ta gradesido di e manera ku el a wòrdu lanta, pero e mester a sali for di Colombia. Hopi situashon a pasa, nan a purba di hòrta su soño di un mucha. ‘Mi tabata tin gana di bai haltu, pero nan a kibra e trapi pa subi yega ariba’ e ta bisa. Den e buki “Rompiendo Silencio” bo por lesa e historia. Ora Katherine a yega Korsou el a sintié na kas. Niun bia e no a wòrdu deskriminá, maske e no tabata dominá e idioma. Katherine ta yama pueblo di Korsou danki i prinsipalmente Dios. E nòmber “Dushi” ta un manera di yama Korsou Danki. E diseño di e kaha ta pa pone Korsou su nòmber haltu, pero tambe di Aruba i Boneiru.
Pa muhé i hòmber
E perfume ta pa hende muhé i hende hòmber. Dushi by Kathy ta pa hende muhé i Dushi by Him ta pa hende hòmber. E tin 1 aña riba merkado. Loke ta pekuliar di e kaha ta ku di hende hòmber ta blanku i esun di hende muhé pretu. E splikashon ta ku tur hende muhé tin un toke di elegansia, no ta importá ku bo tin sèn òf no, I pretu ta simbolisá elegansia. Blanku ta nifiká puresa, i hende hòmber mester di puresa. Ademas, tur perfume ta bin ku un versíkulo bíbliko. Riba e kaha bo por weta e splikashon di Dushi i di unda e palabra ta bin. E no ta solamente un perfume, pero e ta promové Kòrsou tambe.
E toke spesial
Dushi by Kathy su ingrediente prinsipal ta vanilla i tambe un tiki kòfi ku ta krea un meskla imponente. E ta un fragansia ku mi sa ku pueblo di Korsou no lo por lubidá, Katherine ta bisa. E aroma ta kaptiva bo nanishi. Esun di hende hòmber su ingrediente prinsipal ta palu. E ta un produkto di kalidat i 100% original. Tambe tin ‘travel size’. E ta un presentashon nobo ku a kaba di yega Korsou. E ta un idea ku a nanse di Katherine su yu muhé. El a bisa ‘mama dikon bo no ta pensa riba personanan ku no por kumpra un kolonia di fl. 100. Bo por hasi un presentashon chikí pa asina nan tur por hole dushi’. Asina e idea kuminsá, Katherine a traha mas lihé posibel pa por krea e produkto pa e por ta na Korsou dia di San Valentino. Bo ta haña e fragansianan na Botika di Servisio i Samson. Katherine ta konkluí ku e no tin límite pa Dushi, e ke tur loke e produkto tin di ofresé. Aki un par di siman esaki lo ta disponibel na Aruba i Boneiru tambe.
Hopi orguyoso
Katherine ta bisa ku e ta orguyoso di su mes I su logronan. E fragansia a kuminsá ku e pensamentu pa krea ganashi, komo ku e promé buki Katherine tabata repartí pòrnada. Loke Kathy por bisa ta ku e ta sumamente orguyoso di su mes. “Nunka mi a pensa ku lo yega asina leu. E promé presentashon di Dushi tabata hopi simpel i di kalidat inferior. Den transkurso di aña mi a traha riba e produkto pa hisa e kalidat, ku mi a logra’, Katherine a konta. Na e promé instante mi kier a stòp, paso mi tabata enfrentá hopi reto. Pero opstákulo tei pa yuda bo desaroyá bo mes. Bo parti debil ta pa hasi bo mas fuerte pa e siguiente fase di bo bida. Katherine ta sugirí ku ora bo enfrentá retonan bo mester keda trankil i kere den e propósito ku Dios a buta den bo bida. Katherine ta terminá ku e frase: “Awor’ki mi ta poderoso”.
E programa di Djasabra ta deseá Katherine pabien ku su logro nan. Djasabra ta keda pendiente pa e próksimo bia, pa revelá e plannan grandi ku e tin. Tur klase di éksito pa Katherine, I nos ta sumamente orguyoso di progreso I kon e ta promové Korsou internashonal.
