LE BOURGET, FRANSIA, AP.- Fransia, Alemania i Spaña a yega na un akuerdo pa desaroyá un avion i un sistema aéreo di kombate, segun labornan pa redusí nan dependensia for di Merka ta oumentá.
E ministernan di Defensa di e tres paisnan a firma e akuerdo durante e ekshibishon aeronóutiko Paris Air Show kaminda ta establesé kon e nashonnan lo koperá ku e proyekto, ku probablemente lo inkluí un generashon nobo di avion di kombate.
E proyekto ta kuadra ku e mandatario su ambishon pa oumentá e koperashon europeo miéntras Merka, ta ninga di sostené e kontinente riba e tereno militar.
Sinembargo, e ophetivo di e tres paisnan lo tuma tempu. Segun estimashon, Futuro Sistema Aéreo di Kombate lo kuminsá funshoná te na aña 2040. E rekerimentunan pa e sistema aéreo di kombate lo wòrdu establesé na aña 2027 i e fase di desaroyo lo start na 2030.
Dassault Aviation i Airbus lo konstruí e avionnan, kual lo remplasá e Rafale i Eurofighter.
E programa a wòrdu lansá pa Macron i kansier aleman Angela Merkel na aña 2017.
