PARIS (AP).- E kansiernan di Fransia i Alemania a bisa ayera ku e presidente sirio Bashar Assad lo mester bandoná poder, apesar di ku un plan di transishon polítiko ouspisiá pa ONU, ta laga su papel polítiko den futuro habrí.
‘Bashar Assad ta un asesino i mas lihé e bai, mihó’, asina e kansier franses Laurent Fabius a afirmá.
Fransia ta organisá un reunion di diplomátikonan pa djabièrnè den kua nan lo buska formanan di pone fin na e violensia na Siria.
Despues di kòmbersá ku Fabius, e minister aleman di Relashonnan Eksterior, Guido Westerwelle, a bisa ku ‘no tabatin pordon’ pa e aktonan di Assad i ku su gobièrnu ‘mester kaba’.
Westerwelle, ku lo sali pa Moskú mañan, a indiká ku lo trata di konvensé Rusia pa e tuma un posishon mas firme kontra e presidente sirio.
E plan ouspisiá pa Nashonnan Uní i akordá na Ginebra djasabra ta pidi un gobièrnu di transishon. Sin embargo, riba insistensia di Rusia, ta bisa ku Assad lo por forma parti di e outoridatnan interino.
