PARIS, AP.- Biaheronan den Fransia a topa djabièrnè ku un segundo dia konsekutivo di káos di transporte, miéntras sindikatonan ta trahando duru pa e protesta kontra presidente Emmanuel Macron. E mandatario kier ahustá e sistema nashonal di penshun.
Mayoria trein tabata pará, inkluyendo esnan di Metro. Tráfiko tabata fuertemente pegá, kousando filanan largu ku kasi no tabata move.
Palasio di Versailles a keda será i Museo di Louvre a atvertí bishitantenan ku kisas lo sera algun galeria. Toren Eiffel si a bolbe kuminsá risibí turistanan djabièrnè.
E sindikatonan a anunsiá protesta nobo “intergenerashonal” i na nivel nashonal pa djamars. E gruponan ta konsiderá e reforma di penshun komo un atake kontra derechi di e trahadónan.
Por lo ménos 800.000 persona a manifestá den e pais kompleto djaweps den un wèlga ku a pone algun skol i servisio públiko sera. E protesta a alterá funshonamentu di algun hospital i refineria tambe. Polis a tira vários ròndu di gas lakrimógeno i manifestantenan a sende kandela na ost di Paris.
Macron a disidí ku e lo kontinuá ku un di su medidanan klave, ku reforma den e sistema di penshun franses pa transformá e ekonomia.