Museo di ‘Louvre’ ku mester haña un kara nobo ku lo kosta entre 700 pa 800 mion euro.
PARIS, Fransia (AFP).- Fransia ayera a lansa un konkurso internashonal di arkitektura pa renobá i transformá Museo di Louvre, teniendo kuenta ku e “Renasimentu Nobo” anunsiá den yanüari di parti di presidente Emmanuel Macron.
E plan ta ku pa 2031 mester tin un entrada nobo na e museo mas bishitá di mundu. Tambe mester tin un espasio independiente pa su obra di arte mas kontemplá: Mona Lisa.
“P’a mi ta motibu di orguyo pa anunsiá e lansamentu dje konkurso internashonal di arkitektura pa e proyekto ‘Louvre-Renasimentu Nobo'”, segun e minister di kultura, Rachida Dati, a skirbi riba ret sosial X.
E funshonario franses a selebrá”Un impulsa kultural i di arkitektura nobo” pa e museo, “40 aña despues dje piramide”, diseñá pa e arkitekto Ming Pei.
Outoridatnan ta konsiderá e mahestuoso entrada, inougurá den 1988, komo “strukturalmente opsoleto), ya ku esaki a keda konstruí den tempu ei pa 4 mion di bishitante pa aña. Den 2024, e kantidat tabata di nuebe mion bishitante (80% ta estranhero) i e meta dje museo awor ta pa atraé 12 mion bishitante ora ku e obranan ta finalisá.
Kuminsando den 2016, “e bishitantenan ku ke mira Mona Lisa mester paga algu adishonal”, segun Louvre,ounke ainda no sa e montante.
Ta kalkulá e kosto dje proyekto entre 700 pa 800 mion euro (820 pa 940 mion dollar), di kua solamente un parti chikí lo ta finansiá pa estado.
Dia 1e di yanüari 2026 lo drenta na vigor un karchi di entrada mas karu pa estranheronan no residente den Union Europeo, ku e meta pa rekoudá den kareda di 20 mion euro adishonal pa aña.
