JACQUES LeVEUGLE; sospechá di agreshon seksual di sigur 89 menor di edat.
GRENOBLE, Fransia (AFP).- Hustisia franses a hasi un yamada na testigunan pa por haña posibel víktimanan di un hòmber di 79 aña, será i akusá di a violá i agredí seksualmente 89 menor di edat entre 1967 i 2022 na vários pais, entre kua Colombia. E subrino dje hòmber a haña un USB-stick di su tio den kua esaki ta relatá e “relashonnan seksual” ku menornan di 13 pa 17 aña, i a duna esaki na outoridatnan, segun e fiskal di Grenoble, Etienne Manteaux. E agreshonnan a tuma lugá na Colombia, Alemania, Suisa, Maroko, Niger, Argelia, Filipina, India i Portugal, komo tambe den zùitwèst di Fransia i e teritorio franses di New Caledonia, den oséano Pasífiko.
“El a rekoré diferente pais i, den kada un di nan a ofresé su mes pa yuda den skolnan, pues pa e ta dosente i asina konosé hóbennan ku kua el a tene relashon seksual”, segun e fiskal.
E memoria dje USB ku e subrino a haña, a permití pa yega na e kantidat di 89 menor agredí. Di esaki, den kareda di 40 por a keda identifiká i nan a presentá un denunsia, pero investigadónan ta kalkulá ku algun dje víktimanan kisas no ta figurá den e informashon ku a haña.
Pa e motibu ei, fiskal a publiká nòmber dje sospechoso, Jacques Leveugle, ku e meta pa otro víktimanan por presentá nan mes i asina por konta ku mas testigu.
“Tempu ta pèrtá”, segun e fiskal, ku ta spera di por konkluí e investigashon e aña aki teniendo kuenta ku e edat avansá dje akusado.
Den kaso di Colombia, Leveugle a biaha pa e pais andino entre 1996 i 2023. Ounke ku t’awor e kaso a bira konosí, e hòmber a keda detené for di 2024, akusá di violashon i agreshon seksual. E akusado den su ‘memory stick’ a indiká di a mata dos persona”, segun ministerio públiko. El a rekonosé di a asfiksia su mama ku kusinchi den dékada di 1970. Su mama tabatin kanser terminal. Tambe ku den dékada di 1990 el a mata un tanta di 92 aña. El a mata e tanta pasobra e ker a bai biba den zùit di Fransia i e tanta tabata suplik’é pa no bai.
