PARIS, AP.- Kámara di representante di Parlamento na Fransia a aprobá un lei ku e ophetivo pa duna muhénan soltero i parehanan lesbiana akseso na fekundashon ‘in vitro’, kongelamentu di ovulo i remedinan pa fertilidat.
E medidanan di reprodukshon ta parti di un proposishon di lei mas ekstenso aprobá pa Asamblea Nashonal, kaminda e gobièrnu di presidente Emmanuel Macron tin mayoria.
E sistema di salú lo kubri tur kosto di prosedimentu di reprodukshon asistí pa tur muhé bou di 43 aña di edat.
E lei franses ta permití e prosedimentu aki solamente pa parehanan heteroseksual infértil, kual a pone ku mayoria pashènt a biaha pa un otro pais i buska tratamentu di fekundashon ‘in vitro’ einan.
Un persona ku a biaha pa Dinamarka pa e tratamentu di fekundashon ‘in vitro’ a bisa ku e proseso den un otro pais ta kosta mas o ménos 10.000 euro, inkluyendo biahe.
Parehanan lesbiana, muhénan soltero òf ámbos ya tin akseso legal na e reprodukshon médiko den 18 di 28 pais di Union Europeo.
Diferente aktivista konservador a marcha den Paris, oponiendo kontra di e lei na komienso di luna. E manifestashon a wòrdu organisá pa e mesun grupo ku a oponé kontra legalisashon di matrimonio di mesun sekso na Fransia.
