PARIS, AP.- Fransia a aprobá un impuesto inovador pa empresanan teknológiko gigante manera Google, Amazon, Facebook, apesar di menasanan di Merka pa apliká impuesto riba importashonnan for di Fransia.
Fransia a vota despues ku Merka a anunsiá ku lo investigá e impuestonan aki.
“Entre aliado, nos por i nos mester resolvé nos diferensianan sin usa menasa” segun Bruno le Maire, minister di Ekonomia i Finansa. “Fransia ta un nashon soberano. E pais ta tuma su propio desishonnan soberano relashoná ku medidanan fiskal”.
E impuesto ta representá un obligashon anual di 3% pa kompanianan ku ta rekoudá mas di 750 mion euro pa aña. E impuesto lo afektá e empresanan ku ta usa datonan di konsumidó pa bende publisidat riba internèt.
Aktualmente, e kompanianan no ta paga kasi nada di impuesto den e paisnan kaminda nan ta laborá ku entrada haltu, manera ta e kaso na Fransia.
E Ministerio di Ekonomia i Finansa den e pais a kalkulá ku e impuesto lo rekoudá 500 mion euro pa aña.
Fransia no a logra konvensé su sosionan di UE pa pone impuesto riba kompanianan teknológiko ku ta dominá gan parti di e kontinente, pero e pais mester konkretá un akuerdo internashonal ku 34 pais miembro di Organisashon pa Koperashon i Desaroyo Ekonómiko.
