PARIS(AFP).- Fransia djaluna benidero por bira e úniko pais pa hinka den lei e “libertat garantisá” pa hasi aborto. Ayera e proyekto di lei a superá e último opstákulonan di un proseso largu despues dje restrikshonnan imponé na Merka den 2022.

Senado a duna su aprobashon pa e reforma konstitushonal, ya aprobá pa Asamblea Nashonal dia 30 di yanüari.

Djaluna benidero, ora ku tur dos kámara reuní den un Kongreso ekstraordinario na Versailles, den zùitwèst di Paris, konvoká pa e presidente Emmanuel Macron, lo hasi e lei ofisial.

“Na momento ku e derechinan di hende muhé ta keda ataká rònt mundu, Fransia ta lanta para i ta sali na defensa di progreso”, segun e promé minister, Gabriel Attal, riba ret sosial X.

Ku eksepshon di sorpresa, e resultado lo ta faborabel. E inskripshon tin mester di un mayoria di tres kinta parti di esnan presente i, di e 925 legisladornan franses, 760 ya a duna nan aprobashon.

“Nos ta duna speransa na mundu kompleto. Awe, muhénan polako, húngaro, norteamerikano, iraní i argentino ta mira Fransia ku atmirashon”, segun e ekologista Melanie Vogel.

Na Fransia, kastigu pa aborto a keda eliminá den 1975 via di un lei promové pa e minister Simone Veil, ikono di emansipashon femenino i kende a sobrebibí Holokousto.

Ounke ku aborto no ta realmente kuestioná na Fransia, pais kaminda den 2022 a praktiká 234.300 kaso, e desishon di Korte Supremo di Merka di stòp di rekonosé aborto komo un derecho federal a aktivá alarmanan den e pais.

Den novèmber di 2022, Asamblea Nashonal franses a aprobá un inisiativa di oposishon iskierda radikal pa inskribí aborto den Konstitushon di 1958 komo un “derechi”. Pero Senado den febrüari di 2023 a kambi’é den un “libertat”. Despues di frakasá den su promé intento, Macron a hasi un reforma i a proponé un “libertat garantisá”, komo konsenso.

LAGA UN KOMENTARIO

Please enter your comment!
Please enter your name here