PARIS, AP.- Mayoria turista ta kanselando nan plannan di biahe i Paris ta desplegando míles di polis riba kareteranan franses miéntras e pais ta prepará pa wèlga nashonal i protestanan masivo kontra plan di presidente Emmanuel Macron pa restrukturá e sistema di penshun.
E sistema di transporte tambe lo wòrdu afektá pa e wèlganan. Lo kanselá diferente buelo i servisio di trein i bus. Aparte di esaki lo para gran parti di e sistema supteraneo.
E trahadónan di riel nashonal SNCF tin plania di stòp di traha djárason, miéntras ku otro servisionan lo stòp desde djaweps mainta, durante un periodo indefiní.
Sindikatonan a organisá un marcha masivo pa djaweps, i polis a atvertí ku esaki por provoká diferente kaso di violensia i a duna òrdu pa sera negoshinan, cafe i restorantnan tambe a lo largo di e ruta. Outoridat a prohibí tur protesta riba Champs Elysees, alrededor di e palasio presidensial, serka di Parlamento i serka di e katedral di Notre Dame.
E hefe di polis di Paris, Didier Lallement, a bisa ku 6.000 agente lo vigilá e siudat, evitando e posibilidat pa manifestantenan ku chaleko hel i ekstremistanan problemátiko di uni e aktividatnan.
