PARIS, FRANSIA (AFP).- Despues di kasi dos luna ku tabatin elekshon parlamentario, Fransia ta sigui warda pa mira ken ta bira su próksimo promé minister. Presidente Emmanuel Macron ketu bai ta buska un kandidato.
Macron den luna di yüni direpente a konvoká elekshon legislativo ku e meta pa haña “aklarashon” dje panorama polítiko despues di viktoria di ultraderecha den elekshonnan europeo.
Pero e resultado a hinka Fransia den un situashon polítiko no deseá, ku tres grupo ku a surgi: iskierda, sentroderecha i ekstremo derecha i tur tres a keda leu for di e mayoria apsoluto di 289 diputado.
Fuentenan yegá na e presidente a bisa ku probablemente ayera por a anunsiá ken ta bai para na kabes dje gobièrnu, pero algun ora despues a informá ku tòg no a keda kla.
“Nos ta avansá. E kriterionan dje presidente ta sigui pa “no sensurabilidat” i e kapasidat di forma koalishon”, segun un fuente yegá na e mandatario, refiriendo na e echo ku Macron ta buska garantia pa e futuro gobièrnu no keda bahá di forma inmediato dor di Parlamento.
E eks minister di derecha Xavier Bertrand i e eks promé minister sosialista Bernard Cazenueve, a keda bahá for dje lista di posibel kandidato. Bertrand tabata hopi menshoná, pero su historia polítika ta indiká ku nunka el a yega di tin un mayoria pa aprobá ningun lei ku el a presentá.
Ken ku keda nombrá ta kore e riesgo di un moshon di sensura respaldá tantu pa e grupo di iskierda komo esun di derecha ekstremo, enkabesá pa e partido Agrupashon Nashonal (RN), tur dos kontra di Macron.
Den parlamento, RN i su aliadonan tin 142 diputado; e aliansa di Macron, 166 i e koalishon di iskierda Frente Popular Nobo, 193.
