WILLEMSTAD/DEN HAAG.- Resientemente por a tuma nota di un videoclip ku a kuminsá sirkulá riba retnan sosial na unda popular kantante FRENNA di Ulanda, ta kanta un kansion parsialmente na Papiamentu. Den e videoclip aki por apresiá partisipashon di Gabriëlla dos Santos, Miss Universo Kòrsou 2022, ku aktualmente ta figurando riba diferente portada di importansia mundial. Un kombinashon sensual p’e kansion i videoclip “Hopi Amor” ku awe ta keda lansá.
FRENNA lo ta dominando zomer na Ulanda i den Caribe, i lo pèrkurá pa tur hende disfrutá di e próksimo 7Fest ku un sentimentu kaluroso kòrdando Kòrsou su bientu fresku, solo kayente, playanan bunita i bon vibrashon! 7Fest ta programá pa tuma lugá dia 19 di yüli próksimo na Malieveld, Den Haag.
FRENNA tin hopi aña ta bishitá Kòrsou i kada presentashon ku el a hasi tabata un éksito rotundo, asina por menshoná e último evento grandi den kual el a figurá PinkMas ku a konta ku un ‘sold out’ na Capital C.
E kansion “Hopi Amor” ta papia di un pareha enamorá den kual e kabayero ta konfirmá su deseonan i ta manifestá un amor duradero. Un kansion produsí pa entre otro Spanker, Vanno (ámbos di Kòrsou), Joshua i Elisha (tambe kompositor).
“Hopi Amor” ta un zouk ku aksèntnan Afro kantá na Papiamentu i Ulandes, hopi fásil pa komprondé i te asta identifiká kuné. Mixing a keda den man di Chopz, konosido ingeniero di zonido for di Kòrsou ku tin algun aña trahando ku FRENNA i a kolaborá riba e.o e fenomenal álbùm “Pink Summer”.
E videoclip ta un produkshon di Greyan Pastor otro yu di Kòrsou sobresaliente den mundu di sinematografia. Mester bisa ku “Hopi Amor” ta forma parti di un proyekto mas grandi ku lo keda lansá e zomer aki.
Ku e lansamentu nobo aki, FRENNA un biaha mas ta proba dikon e ta keda importante den esena di músika urbano Oropeo. “Hopi Amor”, ta mas ku djis un kansion—e ta un bon ambiente.
Ku miónes di stream na su nòmber i kolaborashonnan ku artistanan di peso mundial FRENNA ta sigui ekspandé su zonido miéntras e ta keda fiel na su raisnan. “Hopi Amor” ta kla pa dominá ‘playlist’ i pistanan di baile den henter Europa i Caribe e zomer aki.
E kansion ta optenibel riba tur plataforma di streaming, kompañá pa su videoclip impreshonante grabá na Kòrsou, kapturando e esensia di romanse karibense i e kultura lokal vibrante.
