BEIRUT, LIBANO, AP.- E lider di Frente Nusra di Siria a bisa atraves di un grabashon di video transmití djaweps, ku e grupo a kambia su nòmber i no tin mas vínkulo ku Al Qaida, den un intento pa kuminsá un kampaña aéreo ruso i merikano kontra su kombatientenan.
E anunsio ta e promé okashon kaminda un fakshon kompletu di Al Qaida ta señalá di bandoná e ret terorista. Pero e akshon a tuma lugá ku aprobashon di e liderazgo sentral di Al Qaida i su ideologia ainda ta meskos.
Merka, kende t a konsiderá Nusra un organisashon terorista, a ekspresá su falta di konfiansa inmediatamente. Josh Earnest, bosero di Kas Blanku a bisa djaweps ku Merka ainda ta evaluando e intento di lidernan di Nusra di ataká Oksidente i a señalá ku e kampaña militar, enkabesá pa Merka ta di focus riba vários grupo ekstremista, inkluyendo Nusra i e grupo Estado Islámiko.
Pero e medida por kompliká esfuersonan di Merka den Siria.
Sin e nòmber al Qaida, e grupo por purba ekstendé su aliansanan ku otro rebeldenan sirio, inkluyendo esnan relativamente moderá ku ta respaldá pa Washington i su otro aliadonan. E akshonnan por oponé na atakenan aéreo internashonal kontra kombatientenan di Nusra, argumentando ku awor nan ta simplemente koleganan rebelde ku ta kombatí kontra presidente Bashar Asad, no un grupo afiliá di Al Qaeda.