WILLEMSTAD.- E èks futbolista sr.Frits Gerhard Meursing a hasi un bunita gesto na su skol di pasado ku ta Mgr. Nieuwindt College na Mundu Nobo. Ayera EXTRA a entrevistá Frits riba su karera di futbòl for di Kòrsou, i ku a hib’é te Guatemala, kaminda el a haña distinshonnan haltu di parti gobièrnu di Guatemala. E entrevista ku Frits a tuma lugá den kurá di skol di Mgr. Nieuwindt College, kaminda e mundu di futbòl a kuminsá p’é. Na final dje entrevista, el a hasi un bunita gesto, dor di entregá skol e buki “100 Aña Futbòl, organisá na Kòrsou” di sr. Valdemar Marcha, spesialmente p’e muchanan di skol. E entrevista ta den kuadro di e programa digital di EXTRAhuntu ku 88Rockorsou, “Gol di Kòrsou”, ku ta pasa tur djamars riba nos wèpsait i tambe página di Facebook. Tur esaki ta den kuadro di partisipashon di Kòrsou na Mundial di Futbòl 2026. Riba potrèt por mira momentu ku yùfrou sra. Jeanne Hellburg, direktor di Mgr. Nieuwindt College, ta risibí e buki for di man di Frits. Un bunita gesto ku e ke laga atras pa hubentut di su skol “bieu”.
