Fuego a habri kaminda pa praktiká “video games” profeshonalmente

461

Si ‘games’ tabata algu djis pa entretené, un hòbi pa un ratu, awendia e ta un deporte ‘Esports’. Fuego ta e promé organisashon i esun di mas grandi di Esports (video game profeshonal) na Kòrsou ku a partisipá den un di e kompetensianan di Esports di mas grandi e aña aki, e World Series di Free Fire 2022. Fuego a sòru di saka kara di Kòrsou pará banda di e organisashonnan di Esports mas grandi di vários region rònt mundu, manera Latino Amérika, Oropa, Estádos Unídos, Asia, den un kompetensia ku un total di 2 mion dòler na premio. E tim di Fuego a biaha pa Singapur kaminda nan tabatin e oportunidat di papia ku medianan internashonal, praktiká i partisipá den e kompetensia.

Riba e dia di  kampionato, e tim di Fuego a sòru di destaká i a logra sali di 18 lugá di mundu, kaminda nan a bai kas ku un premio di 40 mil dòler. For di su inisio, Fuego su meta ta pa por a kompetí den un kampionato internashonal, i den ménos ku 3 aña, nan a logra esaki. E evento aki ta marka e di tres momentu kaminda Fuego a logra subi esenario di kampionatonan internashonal. “Tabata un honor di por a representá Kòrsou komo un organisashon ku miembronan di diferente nashonalidat. Nos lo sigui krese den e industria aki ya ku nos ta mirando sigur e potensial di esaki” asina Jeff Macolonie, fundadó di Fuego a bisa.

 

Skol no tabata mi kos

I Djasabra a papia ku Jeff, un hóben, hopi yòn, ku tabata desidido loke e tabata ke den bida. Fuego ta eksistí kasi 4 aña ku el a kuminsá. Jeff tabata un profeshonal video gamer. For di yòn e ta hunga e ‘videogame’ nan meskos ku hopi mucha yòn tabata hasi. Den 2013 pa 2014 tempu e tabatin 16 aña  el a ripara ku a kuminsá Esports ku ta ‘electronics sport professional video gaming’. Tabata algu basta yòn i no asina grandi manera awor. Jeff a ripará ku tabatin diferente hende rònt mundu ta kompetí i gana sèn kuné. E no a tum’é na serio e tempu ei pero 3 aña  despues, den kareda di 2015, Jeff a hasi 18 aña i e tabata studia na Fambo komo ICT. Semper el a bai bon den skol pero tabata pasobra e mester tin algu pero nunka el a gusta studia. El a hunga un wega League of Legend meskos ku tin diferente otro tipo di wega mas manera Call of Duty, Fortnite etc., etc. I tabatin kompetensianan ta bin i Jeff tabata hunga riba un server i e tabatin su rango i e ta hisa su puntonan i riba e server e otro hungadó i timnan ta mira kon haltu e ta na nivel. El a hunga den region di Latinoamérika i el a subi den tòp 10 den henter e region. Esei ta nifiká ku e tin un nivel hopi haltu i e no a ferwaktu nada den su direkshon pero un tim a aserk’é i mustra interes den dje. Nan a ofresé pa forma parti di nan tim pa mira si e por hunga pa nan. Jeff no tabata sa kiko ferwaktu pasobra su spañó no tabata bon i ta kompetensia ku timnan den Latinoamérika. Pero el a bai e tòg i a ripará ku e barera di komunikashon no ta un problema ya ku Jeff ta dominá ingles. Asina nan a tuma den nan tim. Nan a bis’é di no por a pag’é masha hopi ainda pero por a pag’é 350$ pa luna. Jeff su mama no tabata kere mashá pasobra ta algu nobo i e ta duna su mama rason pasobra mayornan semper ta kouteloso. Pero Jeff a tum’é miéntras e tabata bai skol ainda. Pero despues el a ripará ku skol tabata tum’é demasiado tempu for di dje. Skol ta stroba game i game ta stroba e skol. El a buska informashon di kiko e por logra i si e por hasi karera den gaming. Miéntras tantu añanan a sigui pasa i Esports a sigui krese ku kompetensianan grandi tabata bin.

Muda pa Mexico

El a nota ku e kos aki por bira un karera pe. Komo e no ta masha amante di skol, e no tabata sinti mashá pa skol pero tabata bai skol pa tin un kos sigurá pa su mes. El a bai papia ku su mayornan i nunka mas e ta lubidá; ‘Mi a lanta un mainta i splika mi mayornan ku mi ta kompitiendo awor aki den un liga di ‘second year’ i si mi gana mi por haña tantu sèn. Mi kier a stòp ku skol. Esaki ta algu ku mi ke hasi i skol ta strobando mi’. Jeff a bisa ku ta opvio ku un mayor lo no gusta tende esaki pero nan a mira kuantu tempu el a hinka den e kos aki kaba miéntras e no tabata siñando manera lo a ferwaktu di dje. Su mayornan a dun’é un aña pa logra loke e ke logra i si e no logra e mester bai bèk skol i si e no ke bai bèk skol e lo tin di traha ku su tata. Jeff a tuma e rísiko i a kita for di skol. Den 6 luna el a logra kualifiká na e liga profeshonal i Jeff mester  a muda bai biba na Mexico pa dos aña. El a biba einan den Gaming House ei kompetí profeshonal. E tabata kompetí den stadionnan ku hopi fanátiko. Tabata un eksperensia inkreibel. Jeff tabata gana 4 mil dòler pa luna hungando den e liga ei miéntras tur kos tabata paga pe. Jeff no tabatin niun gastu ku e mester a paga di su salario.

 

Asin’akí Fuego a lanta

Ora Jeff a stòp di hunga profeshonal 2 aña despues pasobra el a bira muchu empresario i tabata pensa muchu manera komersiante miéntras e tabata mira hopi oportunidat i a mira un gèp den e merkado di Karibe. Den Karibe no tabatin tim i e kier a bira un pionero den esaki. Asina el a trese algun amigu huntu i nan a kuminsá ku un tim. Nan a laga diseño un nan logo i a disidí di purba algu nan mes. Miéntras tantu el a sera konosí ku un Mentor di dje Eleonora, un empresario grandi i eksitoso i el a yud’é ku e parti di kontaktonan pa e sera kuné.  Jeff a haña hopi sosten di empresarionan i asina el a lansa Fuego na Volkswagen, un empresa ku a sostené for di prinsipio. I awor aki su trabou ta den e empresa Fuego BV.

Eksportá talento lokal

E kompania tin base na Kòrsou pero nan tin diferente lugá internashonal ku nan ta kompetí den dje meskos ku nan tin hungadónan di diferente nashonalidat manera dominikano, hamaikino i di focus riba e islanan den Karibe i den sentro i Latinoamérika. Ta diferente talento nan tin i un di nan ophetivonan prinsipal ta purba di haña mas talento di Kòrsou i eksportá esei. Meskos ku tin talentonan di otro isla nan ke yega na hasié ku e hóben di Kòrsou mes. I den e kuadro aki nan ta lantando un akademia. Kada aña  nan ta hasi un ‘recruitment challenge’ i por apliká pe i si pasa tur fase bon por djòin Fuego. I nan di Fuego ta yuda push e talento lokal. I esaki no ta solamente pa gaming, pero muchu mas ku tin di aber ku por ehèmpel para dilanti kámara, krea kontenido, training di media etc., etc. E mundu di Esports no ta solamente ‘videogaming’ profeshonal pero e ta henter un sistema di entretenimentu i tin diferente karera ku por haña den dje. Hopi ku no sa di Esports i no ta tuma nan tempu pa wak kiko e industria ta, no ta ripará ku Esports ta mesun kos ku deporte tradishonal, meskos ku MLB i deportenan tradishonal pero solamente e ta riba ‘videogames’.


Uniko na Kòrsou riba Esports

Aktualmente Fuego ta e úniko na Kòrsou ku ta riba Esports.Jeff a splika ku el a mira otro timnan tambe ta bezig ta djòin forsa pa traha un mihó merkado pa Kòrsou i na Aruba tambe tin un pa kuminsá pero pa falta di konosementu p’esei kisas nan a stòp despues di un tempu. Pasobra bo por invertí hopi sin saka hopi afó pero nan komo Fuego a logra traha un modelo di negoshi sostenibel ku nan por gana sèn for di dje tambe.

Kompetensia meskos ku kualke deporte

Fuego a kaba di bin di un kompetensia internashonal na Singapur. Jeff a bisa ku ora papia di kompetensia mundial, hende lo pensa ta kiko esei. Pero meskos ku deporte tradishonal ku tin kompetensia riba stage ku oudiensia grandi ku ta kumpra nan entrada pa wak bo hunga, meskos ‘Videogame’ tin e riba ‘screen’ grandi, ku timnan riba nan kòmpiuter i oudiensia den stadion ta wak kon bo ta hunga. Pa nan, nan a kuminsá hunga den un liga ku diferente hungadó pasobra nan ta hunga den tres diferente liga.  Un di nan ta Free Fire ku ta riba telefòn i a bira un wega hopi grandi den Asia, Latinoamérika dor di e aksesibilidat di telefòn.  Nan a haña hungadónan di Mexico i Sto. Domingo. Na Kòrsou no tabatin hungadó ku e nivel ei ounke ta trahando riba algun ku potensial i nan a kualifiká pa e kompetensia mundial komo number 1 den Nort Amérika. Nan a bira representante di Nort Amérika i asina a bai Singapur den un torneo pa bai kontra diferente pais rònt mundu. Tabatin 20 tim ku a kompetí kontra 100 otro tim den nan mes liga. Tabata the ‘best òf the best’. Komo Fuego nan a representá Kòrsou. Na Singapur nan a sali na di 18 lugá ku ta algu grandi pa nan pasobra nunka Jeff a ni pensa ku nan lo a yega mundial ounke esei tabata nan meta. Nan a yega Mundial den ménos ku 4 aña tabata algu grandi pa nan.

 

Federashon di Esports pa Kòrsou

Jeff ta haña ku tòg aki na Kòrsou mester pone un tiki mas atenshon na ‘videogame’. Na Kòrsou tin hopi ‘gamers’ i ta un lástima ku no tin sufisiente manera pa duna nan e oportunidat ei pasobra na Kòrsou  no tin struktura ainda pa laga e ‘gamers’ mehorá den loke nan ta hasi. I p’esei e ta purbando komo Fuego i komo un persona ku a eksperensiá  e parti profeshonal di game pa trese mas dilanti pa duna e ‘gamers’ un plataforma pa por demostrá nan habilidatnan i tambe pa trein i mira si nan tin potensial pa por kompetí den eksterior. I den e kuadro aki e ke yega na un federashon pa Esports na Kòrsou i pa por kompetí den e otro kompetensianan mundial ku ta konsentrá riba e pais mes. Asta awor aki ke drenta weganan olímpiko. Ta su meta pa Kòrsou su nòmber ta tur kaminda.

Sostené bo yu, e oportunidat tei

Komo konseho na mayornan Jeff a bisa lo siguiente “gaming ta aki i no por evit’é. E tei pa keda i lo sigui krese tambe. E mihó kos ta pa sostené bo yunan, komprondé nan. Hopi mayor no ta komprondé e motibu dikon un mucha ta hunga wega asina tantu. E por ta keda tenta na skol i esei ta su eskape, e lo tin interes pa hasi e sistema di skol tradishonal i kisas e no por siña pero su IQ ta haltu pa hunga wega i mayornan hopi bia ta asina drùk den nan trabou i nan bida ku no ta tuma nan tempu pa wak kiko nan ta bezig kuné. Mi tin sigur tin diferente mayor ta tende nan yunan ta grita ingles i spañó den kamber. I miéntras nan ta papia ku hende rònt mundu i papia internashonal. Si bo tuma bo tempu pa komprondé loke nan ta hasi i hasi un tiki investigashon riba e mundu di entretenimentu i Esport i sostené bo yu. E oportunidatnan tei. Ami ta un ehèmpel i pa Kòrsou por ta un ehèmpel grandi. Nos meta ta pa yega mundial i sigui bai mas leu”.

LAGA UN KOMENTARIO

Please enter your comment!
Please enter your name here