Keiko Fujimori lo asumí presidensia di Perú despues di bintiseis aña ku su tata a dirigí e pais
LIMA, Perú (AFP).- E derechista, Keiko Fujimori, a keda eligí komo presidente di Perú despues di un elekshon hopi pèrtá ku ta marka e regreso di “fujimorismo” na poder, den un pais ku un krísis institushonal króniko. Ademas di esei, e pais ta gòlpiá pa krímen organisá.
Fujimori (51) a gana pa ménos ku un punto di su rival di iskierda, Roberto Sanchez, segun datonan final ku a keda publiká ayera, tres siman despues dje elekshon.
E derechista a risibí 50,13% di e votonan, kontra di 49,86% di Sánchez, segun Ofisina Nashonal di Prosesonan Elektoral (ONPE). E diferensia ta di ménos ku 50.000 voto.
“Nos ta hopi serka pa kuminsá ku e kaminda di órden i speransa pa tur peruano”, segun Fujimori a publiká riba X despues ku e resultado a bira konosí.
Ta spera ku den e próksimo dianan e outoridat elektoral lo proklamá, di forma ofisial, e resultado i ku dia 15 di yüli lo hasi entrega dje kredensialnan di e presidente eligí.
“Nos ta warda riba e proklamashon ku hopi humildat, prudensia i responsabilidat”, segun Keiko, kende lo goberná Perú for di 28 di yüli awor te ku yüli di 2031.
Su viktoria ta marka e regreso di “fujimorismo” na poder, mas di dos dékada despues di kaida di su tata, e èks presidente outókrata Alberto Fujimori (1990-2000).
PAIS DIVIDÍ
E oumento di kriminalidat ta e preokupashon prinsipal di peruanonan. Ademas dje pelea kontra di delinkuensia, Fujimori lo tin entre e retonan pa duna un ‘push’ na ekonomia i dera e krísis institushonal ku a trese kuné ku Perú a konta ku ocho presidente for di 2016. Vários di nan a keda destituí dor di Kongreso òf a renunsiá promé ku esei a tuma lugá.
E futuro presidente a rekonosé ku Perú “a keda fragmentá” pa polarisashon debí na e kampaña i e márgen pèrtá den resultadonan den e di dos buèlta.
“Nos sa ku nos pais ta dividí. Nos tin e responsabilidat pa skucha tur dos banda. E portanan di diálogo ta habrí”, pa Sanchez i tur e forsanan, segun Keiko a bisa ayera.
Su rival Sanchez ta e heredero polítiko dje èks mandatario Pedro Castillo, kende ta prezu despues di un gòlpi militar frakasá den 2022.
