WILLEMSTAD – E patriarka di e konsepto Sambil, Salomon Cohen Levy a bai sosegá. Asina diferente medio di Venezuela a informá den fin di siman. Bou di Cohen, e konsepto Sambil a resultá unu eksitoso na Venezuela i ku despues a ekspandé su alanan den Caribe, entre otro na Repúblika Dominikano i tambe na Kòrsou. E empresa a hasi 5 aña na Kòrsou resientemente.
Cohen tabata na kabes di e kompania konstruktor Sambil i a konstruí en total 9 sentro komersial. E informashon di su morto a sali for di Cámara Venezolana de Centros Comerciales, Comerciantes y Afines (Cavececo) riba Twitter. E yu, Alfredo Cohen ta presidente di e hunta direktiva di Cavecec.
Cohen a fungi ta na su morto komo presidente di Grupo Sambil. E tabatin 89 aña di edat. Di profeshon e tabata ingeniero. El a studia ingenieria sivil na Universidad Central de Venezuela (UCV) i a funda Constructura Sambil na 1958, poniendo e kompania den e posishon komo un di e empresanan mas inovador den e área di konstrukshon di Venezuela. E empresario a konstruí un total 9 sentro komersial na Venezuela, entre nan Centro Lido i Sambil.
For di diferente skina a bin palabranan di lamento pa e legendario empresario. E alkalde di Chacao, Gustavo Duque, a lamentá fayesimentu di e empresario i a solidarisá ku e famianan riba su kuenta riba Twitter.
E sentronan Sambil na Venezuela lo ta será awe djaluna na Venezuela komo parti di e luto ku tin pa fayesimentu di su fundador, asina e kadena di sentro komersial a informá. No tabatin informashon te ku ayera nochi kiko lo pasa ku e empresa na Kòrsou. E yunan di e empresario tin rienda di Sambil Kòrsou. Sambil Kòrsou tabata rant rant ayera relashoná ku Mundial 2018. Prinsipalmente e wega di Colombia a atraé un públiko grandi.
