Fundashon di Fundeshi te Dak; Ta un fundashon ku ta duna kursonan na hòmber, muhé i tiner pa siña fo’i básiko di kiko ta konstrukshon, karpinteria i mètslá di kas.
Temanan ku entre otro lo ser tratá ta marka fundeshi, basha werkvloer, stèl profil , lanta blòki i hopi mas.
Kursonan ta dura 4 siman i lo trata teoria i práktika. Esaki ta loke fundashon di Fundeshi te Dak ta hasi i nos a logra gara señor Renni Emelina dunando hóbennan na Fuik lès. Ounke den e kaso aki ta trata di un otro proyekto tabata importante pa e bai den detaye kiko i kon bin e fundashon.

 

12 aña pasá….

 

12 aña pasá ora sr. Emelina su yu a nase, komo yu prematuro el a bai den couveuse. I sr. Emelina a primintí Dios ku si su yu rekuperá e lo duna bèk na komunidat. E yu tin awor kasi 13 aña, e ta un yu salú ku ta bai skol i hasi deporte. I el a kuminsá ku e parti ku e ta dominá bon. Emelina a bai skol di Brakapoti kaminda el a siña trabounan den konstrukshon.

Fundashon Di Fundeshi te Dak ta eksistí ya pa 8 aña kaba ku ta traha ku muchanan ku a kai for di enseñansa  komo ta kosnan di konstrukshon nan ta siña a duna e nòmber di fundeshi pasobra ta for di einan nan ta kuminsá te Dak. I ora nan kaba ku e trayekto ta buska trabou pa nan. E proyekto no ta tuma muchu hende pareu. Si ta hóben sigur no mas ku 7 i tin biaha asta e por traha ku nan di un pa un. E ta duna na su kas mes. El a drecha un espasio ku su bòrchi, kaminda di pega blòki, kaminda di traha ku palu etc., etc. pa asina e lèsnan por a kuminsá.

 

E ta traha ku muchanan di 17 aña bai ariba pero e tin aktualmente hóbennan di asta 16 aña. Sr Emelina ta traha ku muchanan ku no ta kai mas den e lei di enseñansa obligatorio ounke el a bisa nos di Djasabra ku e no ta kere mashá den e lei ei.  Tin demasiado mucha den klas i e mucha ku no por kapta lihé ta kai afó. I bou di palu ta mas lihé pa e muchanan por bai. El a traha ku muchanan ku ta bisti banchi for di prisòn, muchanan ku a kai den man di hustisia. Muchanan riba mal kaminda el a sòru pone bèk riba e bon kaminda. Mester evitá ku e mucha ta yega piskalat. Na piskalat e mucha ei ta kosta komunidat muchu mas tantu sèn ku si invertí den dje afó pa yud’é siña algu.

 

Teoria i práktika….

 

E ta siña teoria pero tambe práktika. E teoria ta masha importante pa e mucha òf e persona por sa ki midi e blòki tin i kon pa e konta ora di pone esakinan. Sr. Emelina ta masha orguyoso di su trabou prinsipalmente ku e muchanan aki. El a yega di haña mucha ku mayornan ta trese pe pasobra no sa mas kiko hasi ku e mucha. E mucha aki a siña te e mucha ta traha. Esaki ta e satisfakshon pa sr. Emelina.

 

Nada di supsidio…

 

E trabou ku Renni Emelina ta hasi ku muchanan ta algu grátis. E no ta kobra pero ta e lèsnan ku e ta kobra na hende grandi e ta invertí bèk den e muchanan. E ta kere ku gobièrnu mester por kuminsá mira e balor di e loke e fundashon ta hasi ku muchanan. Tin yen fundashon ku e muchanan no ta haña e lèsnan aki i ta nèt e fundashonnan ei ta haña sèn di gobièrnu, siendo ku hopi di e fundashonnan ei ta bin pidi e pa duna lès grátis ta e muchanan.

 

Djasabra i djadumingu di 9’or di mainta pa 12’or Renni Emelina ta duna lès na hende grandi. E ta duna lès na polis, yùfrou i menernan di skol, amanan di kas i hopi mas. Mesun kos ku ta siña e muchanan, ta siña e hende grandi esta pega blòki, basha fundeshi te na Dak.

 

Ounke e no a studia trahadó sosial, sr. Emelina por yuda e hóbennan ku problema. E ta komprondé nan i esaki en partikular hasiendo uso di e konosementu di su kasá ku ta enfermera i ku tambe ta yud’é.

 

 

Trayekto di siña i traha den e bario di Fuik

 

Sektor di Kultura i Deporte huntu ku Federatie Antilliaanse Jeugdzorg  tin un trayekto kaminda hóbennan por partisipá  den un trayekto asina yamá trayekto pa siña  i traha e trabou di karpinté i di konstrukshon. Esaki ta tuma lugá  den e  akomodashon/skol  ku ántes tabata karga e nòmber di Skol Mgr.  Julio Henriquez den e bario di Fuik. E akomodashon  a wòrdu konbertí den un sentro multifunshonal i ya kaba tin diferente aktividat pa mucha i hóben  ta tumando  lugá den e Sentro. E grupo di hóben ku a risibí e oportunidat  den e promé fase, ta desaroyando  den un forma satisfaktorio bou di guianan  profeshonal lokual a krea e oportunidat pa na komienso di aña 2018  bolbe tuma un kantidat limitá de hóbennan  di e region di Fuik i di bisindario den e proyekto.

Den e proyekto na Fuik segun sr. Emelina, ya tin asta kontratistanan ku a bin wak e hóbennan pa traha kuné. E proyekto na Fuik aktualmente no ta di Fundashon di Fundeshi te Dak pero ta hasiendo uso di sr. Emelina su konosementu pa yuda hóbennan.

Banda di sr. Emelina na Fuik, nos a papia tambe ku sr. Cosme Martina. E ta dirigí mas riba e parti di karpinté ku su bon konosementu di enseñansa di 40 aña e ta otro yudansa pa e hóbennan. Sr. Martina a bisa ku ainda e tin ánimo pa traha ku hóbennan i pa e por yuda esnan den problema e ta hasié. El a bisa ku tin yen instansia ku ta papia di hóben pero no tin e formashon pa traha ku e hóbennan aki.

 

Kontakto;

Fundashon di Fundeshi te Dak ta alkansabel na 561-1976

E proyekto na Fuik yama Federatie Antilliaanse Jeugdzorg bou di ora di trabou na telefòn 767-4911 òf 517-5953.

 

 

 

 

 

2 COMMENTS

  1. Hopi bon initiativa. Asina mester hasi riba tur tereno.
    Anto mester lubida e asuntu di 1000 baka ey y pasa over pa 1000 piska!
    Nos klima y medio ambiente ta fit precies pa kumisa ku visvijvers den nos awanan parti paden di Korsou y na otro partinan kantu di laman. Na Hulanda kasi tur piska ta bini foi viskwekerijen/visvijvers.
    Piska no ta shusha medio ambiente, y ta kosta menos plaka pa mantene y ku piska nos ta gana mesun tantu plaka ku baka of mas mes! Baka ta saka gas stinki ku ta kontamina nos airu dia y anochi y hasi e habitantenan den bario malu y malkontentu.

  2. BENDISHON MI RUMAN SIGI KU E BON TRABOW KU BO TA HASI PA E HOBEN NAN GOBIERNU HABRI BO WOWO BAN PONE MAN HUNTU I YUDA BO RUMAN

LAGA UN KOMENTARIO

Please enter your comment!
Please enter your name here