Pa 16 aña kaba di eksistensia Fundashon Dulce Maria ku sra. Dulce Maria La Cruz trahando den komunidat. Promé di a keda ofisialisá komo fundashon, ya e tabata hasi diferente aktividat.
Dulce Maria ta lanta ku inspirashon, buska fondo pa e hasi algu i hasié grátis pa hóben òf hende grandi. E tabatin algun aña asina besig sin e forma di fundashon. Dado momentu, den un programa na Z86 Awe Mainta ku e tabata presentá, un di su invitadonan tabata notario Burgers. El a bin serka dje i semper ora nan kaba ku entrevista e ta keda kombersá ku e invitado. E tabata konta sr. Burgers di su trabounan i kiko e ta hasiendo den komunidat. Einan e notario a rekomend’é pa e lanta un fundashon. Dulce Maria a haña e informashonnan ku e tabata deseá di un fundashon i el a kristalisá esei riba 25 di febrüari 2007 ku por sierto ta un fecha sentimental pa Dulce Maria pasobra su wela a fayesé riba e fecha ei. E tempu ei tabata mil i piku florin pa un fundashon pero awendia el a bira riba 3 mil florin. Pero esei no mester deskurashá niun hende pa lanta un fundashon, basta bo ta kere den dje.
Meta
Ora el a lanta e fundashon, el a hasié ku e meta pa krea siudadanonan felis. Tabata promé kos ku notario a puntr’é esta meta di e fundashon. Sinembargo ora puntra un hende kiko pe ta felisidat e lo kontestá, fiesta, duna ko’i kome i bebe, regalo, duna kos pòrnada etc., etc. Dulce Maria di su banda ta wak e mas amplio. E ta hasié pa eduká, informá, motivá konsientisá i entretené i literalmente 16 aña ta esei ta loke el a hasi komo fundashon, esta siudadano felis. Si mira kon ora motivá e hóben, alsa su balor propio, eduk’é, kon felis e ta bira. Si kue un hende grandi, por ehèmpel e kurso di novèmber aña pasá riba smartphone, tablet i laptop pa esnan riba 65 aña ku partisipashon di hende di asta 88 aña kon kontentu nan a keda pasobra awor nan mes por hasi nan kosnan sin pidi niun nietu ni yu nada. Esei ta e meta di e fundashon aki, den tur kos ku e hasi, e meta ta pa e hende te felis. Meskos hasi e hende konsiente di su derechi. Si pone un charla di un tayer, e hende ta bin tuma su informashon. Na mes momentu bo ta interaktuá ku e hende pa sa kiko nan a komprondé. I ta resultá ku e hendenan a komprondé bon loke presentá den e charla. I kiko ta mas dushi pa mira hende kontentu i felis i e ta hasi Dulce Maria tambe kontentu i felis.
Grupo di enfoke
E grupo di enfoke di e fundashon ta mas pa hende grandi. Antes e tabata duna lès di kòmpiuter pa hende grandi. El a menshoná ku ta su subrino mes, un hóben a duna e lès ku hopi pasenshi pa e hende grandinan. I p’esei Dulce Maria a sigui ku hende grandi. Pero riba kaminda el a haña inspirashon pa kue un direkshon di hóbennan tambe. Hóbennan ta manera poko pèrdí den sosiedat i p’esei el a bai direkshon di hóben i a organisá aktividat pa nan tambe. Aña pasa novèmber el a organisá e aktividat ‘E Kaminda ta Felisidat’ pa hóbennan bin nan mayor. E aktividat a tuma lugá riba Freewinds. E tayer ei tabata eksitoso tambe. I asina e por menshoná hopi kos mas pa hóbennan.
‘Mi famia mes ta yuda ku fondo’
Ta hopi kos e fundashon a organisá kaba. Dulce Maria a konta nos ku ántes i te ainda e ta yega na fondo, pero kos a bira mas difísil pa hopi hende. E tabata haña fondo serka su famia mes. Subrina, tantanan na Ulanda ta depositá sèn pe i e mes tabata traha i hinka sèn den e fondo. Despues el a bai den mas grandi pa duna chèns na mas hende pero gastunan tambe a subi. I asina el a kuminsá buska kooperashon pero ta difísil pa haña e fondonan. El a bisa ku tin bia e ta manda mas di 15 karta i despues kuminsá yama pa e bin na remarke i hopi bia no ta logra. E no sa ku komo ta algu edukativo, p’esei e no ta bin na remarke. Pero tòg e ta haña koperashon tin bia. E último kurso riba smartphone el a haña kooperashon pa promé bia den 16 aña di Reda Sosial i tambe Sefba. Reda Sosial a kontribuí bon pero ta nèt 10 hende ménos por a partisipá. E no tabata ke pa nan keda afó i p’esei el a pidi su famia i partner pa asina e yega na e suma pa tòg tur hende por a partisipá.
Mi mes tambe ta felis
E fundashon no solamente ta hasi otro hende felis, pero e ta hasi Dulce Maria mes tambe felis. El a bisa ku e hendenan ta ripara i ta sintié serka dje. E hendenan ku ta partisipá ta mira ku loke e ta hasi ta di kurason. No ta tende fásil di Dulce Maria, di kiko el a hasi òf no. Aña pasa na yüli el a entregá e pin di bon yu di Kòrsou na e 8 boluntarionan kombiná ku un aktividat. Si no ta pa e hendenan aki ku a poné manda kos korant, niun hende lo a sa kiko el a hasi. Ora e hende ta felis, Dulce Maria tambe ta felis.
Den tapara
Dulce Maria tin hopi kos den tapara. Por ehèmpel resien nan a sali Ka’i Mamai. El a saka un komunikado resientemente pa mustra kuantu kos nan a hasi den un siman di tempu. Nan tabatin training dia 4 di mei, dia 5 di mei dia di libertat nan a hasi e sena di pas ku boluntarionan. I despues a bai Kai Mamai serka famia Wall. Einan Dulce Maria a komprondé ku Kai Mamai tei pa hende grandi pero hopi hende no ta sali for di nan kas i ta keda será den kas i no tin hende pa papia kuné i sosialisá. I p’esei e ta hasi yamada riba hendenan pa no keda será den kas pero partisipá na aktividatnan. Den nan 16 aña di eksistensia nan a organisá 2 fundraising ku tabata un One Man Show na tur dos okashon. I despues ku covid a kai aden no por a hasi nada mas. Pero e aña aki tin fundraising atrobe ku ta un Bon Kuné dia 18 di yüni dia di tata. E fundraising ei ta bai den pòt pa asina tin fondo pa por sigui organisá mas aktividat.
Yuda otro
Dulce Maria a bisa ku temporada di covid tambe nan a yuda pero ketu ketu. Nan a yuda estranheronan. Nan a kuminsá ku un i ora a bai buska yudansa pa mas, a yega na e asuntu ku mester yena yen di papel pa por haña e yudansa pa duna otro. Pero e hendenan indokumentá ei tabatin hopi nesesidat i no por a warda muchu. P’esei el a yama e organisashon di dominikano ku Alejandro van Putten na kabes, kende no a duda pa yuda. Den nesesidat mester saka man yuda hende i esei el a eksperensia na e okashon ei. El a haña saku di kuminda e mes a kumpra berdura, fruta i karni i asina por a yuda mas famia. Ora bo kasi e kosnan ei Dios mes ta habri kaminda pa bo.
Atenshon pa hóbennan tambe
Dulce Maria ta konsiente ku tin hopi klup di dama i di hende grandi pero e ta kere ku hóbennan tambe mester di e atenshon. No ta bai skol so i deporte ta konta pa nan. I hende grandinan tambe tin bia falta di transporte pa nan por partisipá na aktividatnan. Aktividatnan ku e fundashon ta organisá kasi nunka ta kobra, i si kobra mes ta te 15 florin pasobra tin komementu den dje. I fin di yüni ta bai tin un tayer kombiná ku un tour pa hóbennan di 12 pa 21 aña. E tour yama Kòrsou bo Isla i su kultura. El a yega na e aktividat aki despues di a tuma nota di un elekshon kaminda e partisipante no por a menshoná un héroe di Kòrsou. I p’esei ta importante pa nos sa nos historia i nos kultura i netamente pa esaki e fundashon ta organisá e aktividat aki pa nos hóbennan.
Mas informashon
I pa por haña informashon por yama na e fundashon 6765967 òf tambe riba nan Facebook Fundashon Dulce Maria, tambe por manda mail na fundashondm@yahoo.com.
